SA miaging Biyernes nahiduaw ko sa Barili, usa sa mga lungsod sa habagatan-amihanang bahin ning lalawigan. Gidapit ko sa akong higala nga tiunay nga si Rene Aiquisola, konsehal sa lungsod.

Kaniadto sa diha pa ko sa National Food Authority (NFA) mag-anhaan ko sa Barili duaw sa mga grains retailers sa merkado. Ako may nagduma sa paglisensiya sa mga grains businessmen sa Rehiyon 7 gawas pagka spokesman.

Ning akong pagkabalik nahingangha ko sa daghang kalambuan nga akong nakita. Matahom nga municipal building, gilain nga legislative building, lapad nga sports center ug cemented municipal roads.

Duna pa tingali mga imprastraktura nga wa nako makita kay nagdali man ang among grupo. Apan nakasaksi mi sa inagurasyon sa Flood Control Project sa Sta. Ana River sa Poblacion ug Diversion Road sa Nasipit.

Nahimamat nako ang maligdong nga mayor nga si Dr.Teresito Marinas ug ang matinagdanong bise nga si Chuckbong Nemeno. Ning ilang panahon nahitabo ang daghang kalambuan, matod pa.

Nahibaw-an nako gikan kang Konsehal Rene nga gihatagan karon nilag dakong pagtagad ang pagpalambo sa organic farming sa mga pilot barangay sa Pangpang, Balao, Budbud, Luhod, Mantayupan, Campangga, Boloc-Boloc, Dakit ug Mantalongon.

Kining organic farming nagwakli sa mga inorganic fertilizers kay makaupaw pagsayo sa yuta nga kawad-ag kinaiyanhong katambok. Himsog kaayo ang mga produkto sa organic farming, matod ni Rene.

Nasinati ko si Rene nga usa ka mait-on nga mediaman. Gikan sa iyang pag-alagad sa estasyon DYRB hangtod sa iyang pagka-tagduma (manager) sa go­vernment station dyMR (Radyo ng Bayan).

Dihang akong nahibaw-an nga siya napili nga konsehal sa ilang lungsod sa Barili. Nakatuaw ko nga suwerte ang Barili. I know him to be a man of vision. A dreamer and a doer. Kaniadto pa.

Busa wa ko mahibung nga siya gipasidunggan sa 2014 isip Most Outstanding Legislator sa Barili atol sa LGU Family and Recognition Day sa lungsod. Tungod kay nakapandayg labing daghang resolusyon ug ordinansa sa konseho.

Dunay higala nga nisugyot nga modagan siya sa taas nga puwesto sama sa pagka mayor o bise mayor. Dako ang iyang katawa nga mibalibad. Tiguwang na kuno siya igo na niya ang pagka konsehal.

Apan wa ta mahibawo sa umaabot kon siya palansaron sa katawhan labi na sa lig-ong sector sa mga negusiyante sa lungsod. Si Rene gikan sa usa ka poli­tical family. Iyang amahan nga si Pete, 87 na, kaduha ma-vice mayor ug ang iyang manghod nga si anhing Bobby namayor.