GIPANGITA karon sa kapulisan ang usa ka sakop sa Chowking Gang kinsa maoy gisuspetsahan sa pagpatay sa usa ka ulitawo niadtong Enero 9, 2010.

Ang insidente nahitabo sa alas 7:00 sa gabii didto sa Pax REsort, Kilometro 14, Barangay Panacan, siyudad sa Davao.

Gipangita mao si Jaylord Gerarcas, alyas Celoy, 19, minyo, ug nagpuyo sa Panabo City.

Si Gerarcas maoy gitudlong miluba kang Mark Dalos, 22, ulitawo, ug nagpuyo sa Sunrise Village, Barangay Panacan.

Ang progress report sa Sasa Police Station nagbutyag nga ang mga nakasaksi sa insidente maoy naghatag og impormasyon sa kapulisan sa pag-ila sa suspetsado.

Nasayran nga nag-inom ang biktima ug suspetsado sa maong lugar apan nagkalalis sila kauban ang wala mailhing tawo.

Si Dalos giingon nga mikulata sa iyang mga nakaaway niadtong higayona kinsa daling mibiya sa maong lugar, apan mibalik sa nahimutangan sa biktima mga duha ka oras ang milabay.

Sa paghiabot sa suspetsado, didto nahitabo ang pagdunggab sa biktima sa makadaghan nga higayon gamit ang icepick, sigun sa pasiunang report sa kapulisan.

Si Dalos nangayo og panabang sa mga molupyo sa maong lugar mao nga gitabang siya ug gipasakay sa bangka subay sa Panacan River ug gihatud sa daplin kalasada aron patambalan, apan namatay siya dihang miabot sa high way sa Panacan.

Ang patay'ng lawas sa biktima gidala sa mga otoridad didto sa St. Peter's Funeral Homes sa Panacan.

Mga sakop sa Chowking Gang sa maong lugar maoy usa sa mga suliran sa kapulisan sanglit sila ang nagpaluyo sa mga kagubot nga nahitabo sa maong barangay. AD