MAS gilig-on karon sa Moro Islamic Liberation Front (MILF) ang gimugnang Task Force Itihad nga maoy magmonitor, magbantay sa sunod-sunod nga pagpangawat ug pagpangsunog sa way tawong mga bay sa mga sibilyan nga namakwet gumikan sa nilabay nga masaker ug sa operasyon sa militar ug kapulisan batok sa Private Armed Groups.

Matud ni MILF Chairman Aljads Murad Ibrahim nga tumong nila nga makatabang sa gobyerno ug sa katawhan sa Maguindanao.

Dunay mga bay sa Datu Hopper Ampatuan ang gipangsunog nga gipasangil ngadto sa Moro Islamic Liberation Front apan hinimuan diay sa laing grupo.

Apil sab sa mga gipangkawatan mao ang mansiyon sa mga Ampatuan nga gisuwayan pa sa pagsunog apan pakyas ang mga suspek gumikan sa seguridad sa militar ug kapulisan.

Bag-uhay lamang nadakpan sila Murad Manakial, Yoyong Salunayan ug Banjo Isnabil, nga misuway sa pagsulod sa pinuy-anan sa Market Collector sa Sharief Aquak nga si George Kanakan.

Apan namatikdan dayon sila sa mga otoridad nga maoy milutos kanila.

Dunay mga tawo nga nakauyon sa gimugnang Task Force Itihad sa MILF apan ang uban gibati og kahadlok sa mga nagbahis-bahis nga mga rebelde nga posibling maka-engkwentro sa militar gumikan sa ilang pag-okupa sa mga lugar sa Maguindanao.(Edgardo Fuerzas)