GIHUGTAN na sa Commission on Election (COMELEC) Joint Security Control Center (JSCC) nga gilangkuban sa 39th Infantry Battalion ug Davao del Sur Provincial Police Office (DDSPPO) ang ilang checkpoint sa mga national highway sa Davao del Sur.
Gipang-deploy na sa militar ug kapulisan ang ilang tropa subay sa mando sa Comelec, aron sikopon ang mga tawong magdala-dala og armas sa ilang pag-biyahe.
Lunes sa hapon, gihimo ang tigum sa JSCC kuyog ang mga personahe sa Comelec didto sa provincial police command ug ilang gihisgutan ang pagpatuman sa nationwide election gun ban.
Determinado ang kapulisan ug militar nga himuong hapsay ug malinawon ang taliabot nga piniliay karong buwan sa Mayo dinhi sa lalawigan.
Si Police Senior Superintedent Ronald Dela Rosa, provincial police director, nagbahad niadtong mga tawong nagmagahi sa pagsunod sa balaod nga way ni bisan kinsang palutson ang JSCC.
Kini sab ang gibuhiang pahayag ni Lieutenant Coronel Lyndon Panisa, 39th IB commanding officer, ngadto sa iyang mga sakop.
Apan, ni Panisa, gikinahanglang di magmug-ot ang kasundaluhan atol sa pagsita sa mga motorista ug angay nga naka-smile kini aron di magbaton og kahadlok ngadto kanila.
Subay sa gipagulang pahayag ni Philippine National Police Police Senior Superintendent Leonardo Espina, didto sa Camp Crame, nagkanayon nga dili hinuon mamahimong pugson ang mga motorista nga ma-inspeksyon ang ilang mga sakyanan ugaling way 'search warrant' ngadto sa mga parte nga confidential ug ugaling di magtan-aw ang tag-iya niini.
Apan matod sa pipila nga makapahimo lamang nga kadudahan ang ilang personalidad kung ila kining himuon ugaling wa sila'y dalang butang nga nahisupak sa balaod.
Gibarugan sa kapulisan ug militar nga gipahimangnuan na nila ang ilang mga personahe sa angayan nga buhaton aron malikayan ang paglapas sa tawhanong katungod.
Angay imuntar ang checkpoint sa hayag nga dapit sanglit 24- oras kini, makita sab ang mga markadong sakyanan sa pulis ug kasundaluhan.(Orlando B. Dinoy)