USA ka menor de edad nga babaye ang misumbong sa kapulisan human gidunggab sa duha ka wa mailhing mga suspetsado ang iyang trato dihang nagsuroy-suroy sila didto sa may White Sand, San Pedro Wharf, Barangay San Pedro, dakbayan sa Panabo, Lunes sa gabii.
Ang complainant mao si alyas Margie, 16, ug molupyo sa Purok 1-A, Barangay Sto. Niño, lungsod sa Carmen, Davao del Norte.
Sumala sa sumbong sa biktima nga nakutlo gikan sa blotter sa kapulisan nga pasado alas 11:00 sa gabii dihang nakadesidar siya nga magsuroy-suroy uban ang iyang hinigugma nga si Richard Opsinar didto sa lugar.
Samtang nagkalingaw og suroy-suroy ang duha kalit nga miabot ang duha ka wa mailhing mga lalaki ug sa way paglangan gidunggab si Opsinar.
Samad dinungaban sa kalawasan ang nahiaguman sa biktima ug daling gidala sa ospital.
Samtang mga suspek paspas sab kaayong misibat padulong sa wa matinong lugar human sa hitabo.
Wa pa natagbaw ang mga suspek gitangag pa nila ang Honda nga motor sa biktima nga dunay plate number LG 1515.
Ang complainant nga si alyas Margie igo na lamang sa pagdangop ngadto sa mga otoridad.
Mga imbistigador sa kapulisan sa siyudad sa Panabo mihimo na sab og imbestigasyon sa hitabo.
Gipangita na karon ang mga suspek. (Marvin Pineda)