PATAY ang usa ka lalaki samtang usa ang naangol human mibusikad ang granada niadtong Lunes mga alas 4:30 sa hapon sa lungsod sa Kalilangan, Bukidnon.

Nakabsan sa kinabuhi diha-diha dayon ang naila sa pangalan nga Pardo human niini gigunitan ang granada samtang kini hubog.

Nilanding sab sa Northern Mindanao Medical Center (NMMC) ning siyudad sa Cagayan de Oro ang naangol nga mao si Danny Jintula, 39, sa susamang dapit.

Matud sa personahe sa NMMC nga nahinabi sa Sun.Star Superbalita nga nahitabo ang pagbusikad dihang gidala-dala ni Pardo ang usa ka granada.

Hubog pa ang biktima nga nagbaklay sa dalan niadtong higayona apan aksidenteng natangtang niini ang pin hinungdan nga iyang nabuhian ug mibuto.

Wala mahitsura ang lawas ni Pardo hinungdan sa iyang kamatayon, samtang si Jintula nga anaa niadtong tungora pipila ka metros ang kalay-on gikan kang Pardo maayong pagkaigo sa tiyan ug sa likod nga bahin.

Giingong kanunay na nga dala-dalahon ni Pardo ang maong granada nga gipanag-iyahan niini. Wala sab masayri kung asa kini gikan ug asa nakuha sa biktima.

Ang Kalilangan Police Station nihimo na og imbestigasyon kalabot sa hitabo ug pag-imbesitgar diin nagumikan ang maong granada.

Samtang si Jintula nga gidala sa NMMC ning siyudad nagpabilin pa sa balay tambalanan ning panahona ug padayon nga giobserbahan sa mga doktor.