GIBATI na ni Bise Gob. Greg Sanchez ang kainit sa kusina sa pulitika. Nireklamo si Sanchez tungod sa matud pa pagpiit kaniya sa buhatan sa gobernador. Giingong gikuhaan siya og pipila ka mga empleyado, consultant ug mga computer lakip na ang iyang Legislative Assistance Fund nga P 23 million.

Kon sa Ininglis pa, Sanchez should know better. Motuo ko nga gibati niya ang kasubo o kahiubos. Apan kon moingon siya nga siya nahibong sa gihimo sa kaniya sa gobernadora, ambot lang.

Isip usa ka pulitiko, si Sanchez nasayod nga himuon gyud sa usa ka pulitiko ang tanan aron ang kaatbang maluya ug malugda.

For updates from around the country, follow Sun.Star on Twitter

Matud ni Niccolo Machiavelli , usa ka Italiano nga pilosopo ug nabantog sa iyang kapraktikal, kon buot nimo nga pildihon ang imong kaaway, hingpita ang iyang kapildihan. Ayaw siya hatagi og higayon nga makaba-ngon.

Kay sa iyang pagbangon, tingalig ikaw na usab ang molukapa.

Kon nagkauban pa sila duha sa gobernadora alang sa pinilialy sa 2010, sigurado ko nga bisan kusi dili gyud si Sanchez makatilaw. Apan ingon gyud niini ang pulitika o ang klasi sa pulitika nga hugaw. Ang mas maayo niya nga himuon nga pangandaman ang dugang pagpanglutos. Kay magpuasa gyud ug hukasan gyud siya sa tanang pribilehiyo.

Pasagdi na lang ang kapitolyo nga mamalibad nga mao ni mao na.

Dili sila mahutdan sa tanang balibad ubos sa haring adlaw.

Kay sila man ang anaa sa gahom ug katung-danan ni Governor Gwen Garcia ug sa iyang mga hinanib nga duphan ang tanang mga gihimo niini nga transaksyon. Pasagdi na lang nang tigpamaba sa kapitolyo nga nibahad nga kihaon ang mga magpasagad sa iyang amo. Hahay kalaay ninyo! Nganong di na man lang mo mokiha.

Psywar kini kansang bugtong tumong mao ra gyud ang pagpabahag sa ikog sa mga dili mapalit.

Wa ko niingon nga hinlo ug puti pas gapas si Sanchez. Matod pas uban, kining mga pulitiko pagaisipon nga kurakot hangtod mapatud-an nga sila ligdong. Apan kon tinuod ang pagduda nga gituyo sa ubang miyembro sa provincial board ang wa nila pagtambong sa ilang session aron dili si Sanchez maka-deliver sa iyang “In defense of an institution” nga privilege speech kay wala may quorum, hinaot ang makaamgo sila nga hinanggaw ang ilang gihimo.

Una, tungod kay angay nila hinumdoman ang ilang trabaho ang pagtambong sa session ug wa mag-agad sa mando sa hara sa diin man nga gingharian. Ikaduha, magduda ang mga tawo nganong dili gusto sa ubang bokal nga mobuka ang baba ni Sanchez.

Wa ko masayod kon dunay bag-o nga anggulo o makapatay-og sa pundayon sa kapitolyo nga impormasyon sa himuong privilege speech ni Sanchez.

Kon naa siyay mga bukog nga habwaon gikan sa kaban ni Gwen, hinumduman niya ang giingon, “If you hit your enemy, hit him hard.” O, ayaw na lang!

Duna ba siyay ikadugang may labot sa Baliligate? Granada o kwitis?

(birada_ruphil@yahoo.com)