KON madayon ang gikatahong plano sa mga ‘sipsip’ ni Mayor Tomas Osmeña nga magsul-ob og t-shirt nga may marka nga ‘Suya Ra ang Probinsya (SRP) sakay sa float sa dakbayan, sama ra nga mokaon siya sa iyang kaugalingong pulong. Di pa lang dugay,ang mayor hugot nga nipasidaan nga way pamulitika sa parada sa Sinulog karong Dominggo.

Klaro kaayo nga ang pagpasuya sa mayor sa liderato sa Kapitolyo ni Gov. Gwen Garcia tipik sa away sa pulitika tali sa duha ka mga lider sa lokal nga kagamhanan sa Sugbo - way labot ang Senyor Sto. Niño, ang giyukboan nga milagrusong imahen sa kalinaw sa Sugbo.

For updates from around the country, follow Sun.Star on Twitter

Makahimo na lang ang kadagkuan sa City Hall sa ilang gusto tungod lang kaha kay nakagasto sila og dako alang sa giingong bongga nga pagpahigayon sa Sinulog 2010? Basin nalimot sila nga ang kwarta nga ilang gigasto di gikan sa ilang bulsa apan buhis kini sa katawhan nga magtutuo sa Senyor?

Sa mga taho, si Nagiel Bañacia, hepe sa South Road Properties (SRP) Management, nipaatab nga ang paghimo og float sa Sinulog mardi gras usa ka pagpasalamat sa Senyor Sto. Niño sa tanang grasya nga nadawat sa dakbayan. Apan apil na niini ang pagpasuya?

Kon motugot si Bañacia sa pagduhig sa maayong kalihokan sa Sinulog, kompirmasyon kini nga nakuhaan na sa iyang maayong pangutok ang kanhi sakop sa media.

Nasayod kita nga nagkainit ang pulitika tungod sa nagsingabot nga nasudnong eleksyon sa Mayo 10, 2010 apan, maayong ilugar nato ang paghimo sa pamulitika aron di malawgaw ang dakong relihiyusong kalihokan sa Sugbo.