USA sa mga gidungag nga kalihokan karong tuiga sa Sinulog mao ang pagpahigayog misa sa Cebu City Sports Center grandstand una magsugod ang grand parade karong Dominggo.

Gitumong kini sa hangyo sa mga tawo nga di na makatambong og misa sa higayong motan-aw na sila sa parada, matod ni Sinulog Foundation Inc. (SFI) executive director Ricky Ballesteros.

For updates from around the country, follow Sun.Star on Twitter

“As early as 8 a.m. abli na ang gate. Para sa wala kasimba, mag-misa inig 8:30 a.m. Inig 9 a.m. mag-start na man ang grand parade,” matod ni Ballesteros.

Kay ang presentasyon moabot man ngadto sa gabii, kadtong mga mananan-aw sa grandstand wa nay higayon nga moadto sa simbahan matag Sinulog grand parade nga natumong sa Dominggo.

Si Ballesteros nipahimangno usab sa mga nangulo sa mga nangapil nga contingent nga motambong sa alas 10 sa buntag nilang tigom karong Biyernes sa Cebu City Sports Center aron ilang mahisgutan ang ubang mga gimbuhaton sa grand parade.

Iyang gitumbok nga ang ilang hisgutan molangkob sa rota sa parada sa matag contingent kon asa sila moestambay sa pagsugod sa parada.

Naandan naman nga carousel ang parada, ang matag contingent mohunong lang ngadto sa dapit kon diin sila nagsugod sa rota sa parada.

“Ato sila papili-on asa sila dapita, asa ang mas dali nila based on where they would come from,” padayag ni Ballesteros.

Kagahapon maoy “deadliest deadline” sa mga contingent, lakip ang 20 ka mga mananaog sa Sinulog sa Kabataan sa Lalawigan niadtong Sabado ug Sinulog sa Kabataan sa Dakbayan niadtong Dominggo aron magparehistro sa grand parade.

Ang mga mangapil sa higante, puppeteers, ug float nga mga kategoriay dunay hangtod nga karon nga moparehistro.

Sa Sinulog sa Kabataan, ang nidaog sa Lalawigan gipangulohan sa Pajo sa elementary category ug Tayud, Consolacion sa high school category.

Ang mga nidaog sa dakbayan, gipangulohan sa Mabolo elementary school sa elementary ug Abellana National School sa sekondarya.