LABING unang dinakpan sa Sugbo nga nakalapas sa gipatuman nga Comelec nga gunban diha sa dakbayan sa Lapu-Lapu usa ka mananahi.
Duha ka managlahing mga kaso ang gi-atubang sa usa ka mananahi nga si Juanito Geonzon, 31, adunay live-in partner nga taga-sityo Commonwealth, barangay Ibo, dakbayan sa Lapu-Lapu.
Kasong kalapasan sa R.A. 8294 kun illegal possession of firearms ingon man ang violation human gipatuman na ang Comelec gunban.
Ang gunban nagsugod niadtong Enero 10 dungan usab sa hingusog nga pagpahigayon sa mga checkpoint sa kapulisan.
Base sa pasiunang imbestigasyon sa Lapu-Lapu City Police Office (LCPO) ang mga sakop Police Station 5 nitubag sa alarma sa barangay Ibo may labot sa giingong lalake nga nagpabuto sa iyang armas.
Naatlan si Geonzon sa responding team nga diha pa sa iyang mga kamot ang homemade nga caliber .357 magnum revolver nga aduna pay unom ka mga bala.
Nasayran nga ang mga lumolupyo dali nga nakatawag og pulis sa dihang nakurat sila sa sipa nga buto sa armas de fuego nga nilanog sa ilang dapit.
Sukad niadtong Enero 10 sa pagsugod sa pagpatuman sa Comelec gun ban sa tibuok nasod, si Geonzon giingong nalakip na sa 61 ka mga tawo lukop nasod nga nadakpan gumikan sa maong kalapasan.
Gimando sa Comelec ang pagpahigayon sa mga checkpoint.(FVQ)