GIPAHIGAYON na kagahapon ang yano nga turnover of command sa duha ka mga bag-ong director sa Mandaue City Police Office (MCPO) ug Cebu Provincial Police Office (CPPO).
Si CPPO Director Jesus Gaquing gihulipan ni Sr. Supt. Erson Digal, kinsa nahimong acting director sud sa duha ka mga buwan sa wa pa sab molingkod si Gaquing sa katungdanan.
Ang paghulip gipahigayon human mogawas niadtong Biyernes ang order gikan sa Camp Crame nga naghulip nila ni Gaquing ug kang Senior Supt. Orlando Ualat sa Mandaue City Police Office (MCPO)(lahi nga estorya).
Si Ualat gihulipan ni Senior Supt. Noel Gillamac (Tan-awa ang lain nga estorya sa pahina 4).
Ang nangulo sa turnover of command mao si Senior Supt. Vicente Loot, deputy director for operations sa PRO-7.
Matod ni Loot, ila kining gihimo aron di sila makuwestyon nganong wa pa ang turn-over nga niadto pa man untang Enero 8 ang mando sa Camp Crame.
Hinuon ang duha ka mga director nipahibawo nga unya pa sila pormal nga molingkod sa katungdanan karong Huwebes tungod kay aduna pa silay asikasohon sa ilang nabiyaan nga opisina.
Si Gaquing nagtuong ang paghulip kaniya may kalabutan sa iya unyang retirement sa serbisyo sa Mayo 22, nga nasulod pa sa election period.
Kon di siya hulipan og sayo, way makapuli sa iyang posisyon tungod sa election ban.
Nagtuo siyang gilikayan sa kadagkuan sa Camp Crame nga di maabtan og election ang revamp hinungdan na gisayo sa paghimo. (DRT)