MGA tulo ka oras human siya buhii sa kapulisan tungod sa pagpanguot, giingong notadong mangunguot nga taga Basilan gipusil patay sa miaging gabii sa tulo ka mga tawo nga nagsakay og motorsiklo.

Namatay diha-diha ang biktima nga si Richard Mañala, 40, taga Isabela city, Basilan human matusak sa mga bala pasado alas 9 niadtong Lunes sa gabii samtang naglakaw sa eskina General Maxilom ug S. Osmeña Blvd, Barangay Tejero, sa siyudad sa Sugbo.

For updates from around the country, follow Sun.Star on Twitter

Sa pasiuna nga imbestigasyon nga gihimo nila ni SPO3 Rey Cuyos sa Homicide Section sa Cebu City Police Office (CCPO) nagbutyag nga naglakaw ang biktima dihang gisundan sa duha ka mga tawo ug gitabangan pagpusil.

Ang biktima nga naigo sa nagkadaiyang bahin sa lawas namatay diha-diha.

Usa ka menor de edad nga nakasaksi sa hitabo niingon nga daling ningsakay sa nagpaabot nga motorsiklo ang duha ka mga gunman nga nipaingon sa Plaza Independencia.

Si Mañala gidakop sa kapulisan pasado alas 6 niadtong Sabado sa gabii sa usa ka mall sa dalan N. Bacalso ug Leon Kilat sa downtown Cebu City human giingong nanguot sa usa ka lalakeng langyaw.

Si Ronald Woods, 66, usa ka American national, niingon ng diha siya sa dapit dihang kalit siyang gidasmagan ug gikuot ang iyang pitaka.

Nakuha gikan kaniya ang P30,000 nga sud ang iyang pitaka.

Nisinggit si Woods hangtod nga nagkaguliyang ang mga tawo.

Ang mga estambay maoy unang nakakupot kang Mañala hangtod nga niabot si PO2 Filomino Viquezo ug iya kining gisikop.

Sa dihang nasikop na ang biktima, wa mabawi ang pitaka kay gikataho nga gipasa kini sa laing kauban.

Si Mañala gitugyan ni Viquezo sa mga sakop sa Theft and Robbery Section (TRS) ug gibuhatan dayon og dokumento aron mapasakaan og kaso ang gidudahang mangunguot.

“Diha na unta toy negusasyon nga iuli ang P30 mil sa kauban pero morag wa madayon kay nagpanagana og uli ang kauban sa kwarta kay nahadlok nga dakpon. Mao tong mo-file na lang og kaso ang langyaw,” matod sa tinubdan.

Apan gibuhian siya sa kapulisan pasado alas 6 sa gabii niadtong Lunes kay wa mobalik ang langyaw aron sa pagpasaka unta og kaso.

Ang kapulisan napugos sa pagbuhi tungod sa kabalaka nga makalapas sila sa gidugayon pagtanggong.

Apan samtang naglakaw na sa dapit nga nahitaboan ang biktima, kinsa gituohang nga mouli na lang sa Mindanao sakay sa barko,gisugat siya duol sa pier ug gipusil patay.

Ang lawas sa biktima anaa karon sa St. Francis Funeral Homes ug wa pay kabanay nga nikuha kaniya.

Si Senior Insp. Michael Anthony Bastes, hepe sa TRS, nikompirmar sa identity ni Mañala kagahapon sa St. Francis Funeral Homes, diin gipailawom sa autopsy ang iyang lawas.

Pito ka mga kabhang sa bala ug usa ka bala gikan sa .45 caliber pistol ug duha ka mga slug ang-narecover sa ningresponding mga pulis.

Ang note sa blotter sa TRS nagkanayon nga si Mañala gibuhian mga alas 5:45 sa hapon niadtong Lunes human sa reglamentary period sa pagbilanggo kaniya.

Si CCPO) Director Patrocinio Comendador Jr., sa interview sa Sun.Star Cebu, niingon nga dunay tulo ka posibleng mga motibo sa pagpatay—usa niini vigilantism. (JFT/dugang taho ni JTG sa Sun.Star)