DUMAGUETE CIY - Nailog sa mga sakop sa 11th Infantry Battalion (IB) ang giingong kampo sa mga rebeldeng grupo human kini nagkaengkuwentro niadtong Biyernes didto sa dakbayan sa Guihulngan.

Sumala ni Lt. Col. Paulito Idul, kumander sa 11IB, nga usa ka M1 garand rifle ug M1 carbine ang nabilin sa kampo sa 20 minutos nga panagbayloay sa bala.

Ang duha ka grupo ang nagengkuwentro niadtong Biyernes sa Sitio Tabunan Barangay Imelda sa naasoyng dakbayan ug way naangol sa habig sa mga sundawo.

Nahitabo ang panagengkuwentro human ang sakop sa mga sundawo ang mipahigayon og security patrol ang gipauwanan sa mga bala gikan sa gibana-banang 20 ka mga armadong tawo.

Human sa 20 minutos nga engkuwentro nakuha sa mga sundalo ang gipuy-ang kampo sa NPA nga dunay mga kuwarto, istrukura, kusina ug board nga dunay mga ob­serbasyon nga nakasuwat.

Laing nakuha mao ang mga nagkalain-laing dukomento, pagkaon ug mga personal nga mga kabtanagan.

Si Col. Francisco Delfin, kumander sa 303rd Infantry Brigade, nalipay sa gibuhat sa mga residente nga mihatag og impormasyon labot sa presensiya sa mga bandidong grupo.