NAGKURAMBOS ang Ayala Land/Cebu Holdings ug SM Prime Holdings Inc. (SMPHI) sa pagpalit sa 26 ektaryas nga yuta sa South Road Properties sa gipahigayong public bidding kagahapon.
Atol sa bidding, usa ra ang bidder--ang consortium o pagpakiuban sa mga higanteng negosyante nga Ayala Land/Cebu Holdings ug SMPHI.
Ilang gipalit ang lote og P10.009 bilyones kun tag P38,015.98 matag metro kwadrado.
Hapit dobleha ang presyo sa Siyudad nga P20,000 lang matag metro kuwadrado.
Ang Awards Committee nitugyan sa 26 ektaryas nga luna ngadto sa consortium.
Human niini, nibayad ang Ayala Land-SMPHI og P1.185 bilyones isip bid security kun 10 porsiyento sa kinatibuk-an nilang bid price.
Base sa kontrata, ang winning bidder mohatag sa 50 porsiyento nga ilang bid price sulod sa usa ka buwan gikan sa ilang pagdaog sa bidding.
Kini naglakip na sa ilang bid security samtang ang laing 50 porsiyento ilang datahan sulod sa tulo ka tuig.
Kini nagpasabot nga ang Siyudad modawat og labing minos P5 bilyunes sa halin sa mao nga luna karong tuiga.
Si Mayor Michael Rama wa magdahom nga mag-consortium ang duha ka magkaribal nga land developer, apan matod pa niya way imposible.
Si Bise Mayor Edgardo Labella nakadayeg sa public bidding nga gihimo itandi sa unsolicited proposal nga maoy gusto sa konseho.
Iya kining gihulagway nga patas ug makaayo sa Siyudad.
Ang vice president for market research ug planning sa SMPHI nga si Ronald Tumao niingon nga ilang tumanon ang terms of reference nga nalatid alang sa 26 ektaryas nga luna.
Kini sama sa pagtukod og arena, lakip na ang mix-used development.
Ilang sugdan pagpalambo sa lugar sa paglabay sa unom ka buwan.
Sa pagsuwat ning balita, nagpadayon ang public bidding sa 19 ektaryas nga luna nga nahimutang gihapon sa SRP.