SA tinguha nga mapukaw ang pagbati sa katawhan sa atong moral nga obligasyon sa pagdepensa sa kinaiyahan, ang Kapariang Agustino nipahinungod sa pista ni Senyor Santo Niño karong tuiga.

Maoy ilang gipaabot sa mga deboto nga ang tinud-anay nga pagyukbo sa balaang batang Hesus wala sa mga pagsayaw-sayaw, ka-on ug hudyaka hinunoa kini naa sa pagpuyo sa kinabuhi sa usa ka sulundong Kristuhanon nga naghatag og importansya sa atong obligasyon sa pag-amuma ug pagdepensa sa atong palibot aron aduna pay mapanunod nga mapuy-ang kalibutan ang mosunod pang mga henerasyon sa kabataan.

For updates from around the country, follow Sun.Star on Twitter

Hinungdan nga ang paghalad sa sayaw pahinungod sa Santo Nino magdala usab unta sa kasingkasing sa pagtuman ug pagsunod ning maong panudlo sa atong Simbahan, ilabi na gyud sa atong mga lider nga nangatungdanan kansang desisyon ug polisiya adunay dako nga epekto sa kinabuhi sa kinabag-an.

Dinhi nitumaw ang pagkwestiyon sa mga environmentalists ning pagpamugos ni Gob. Gwen Garcia sa pagsayaw gyud sa Sinulog Grand Parade kay lagi nahimo na kini niyang tradisyon sukad pa kaniadto. Apan unsa may pulos ning mao niyang pagtuman sa tradisyon kon naa sa maong paghalad og sayaw sa mahal nga Senyor Santo Nino, dili man ang kasingkasing sa pagsalbar sa kinaiyahan kon di mao man ang pagpadayon ning iyang giduso nga coal power plants ug ang pagpamasura sa coal ash sa kagamhanan sa Probinsya nga dayag nga tinubdan sa carbon gasses nga maghaling sa global warming ug kansang abog makadaot usab sa pangalawas sa mismo mga Sugboanon.

Ang haw-ang nga paghalad mahisusama da sa usa ka patay nga buhat. Kay ang tinud-anayng gipahinungdan dili man ang magmumugna sa Kalibutan o ang mabuot nga katawhan kon dili mao ang pagtagbaw lamang sa ilang kauhaw mismo sa personal og kaugalingnong pasikat.

GIKUYAIG NGA HUSTISYA

Dul-an sa duha ka tuig ang milabay una nakapakanaog ang Supreme Court en banc og desisyon nga nagdeklarar kang Tining Martinez III nga maoy tinud-anayng mananaog sa pagka Kongresista sa Cuarto Distrito sa Probinsya sa Sugbo kontra sa milinkgod nang si Benhur Salimbangon.

Dinhi gilapdusan pag-apil sa Korte Suprema ang House of Representatives Electoral Tribunal (HRET) ug Commission on Elections kay langay kaayo ug dugay nga nakaedsisyon sa isyu sa disquatilification sa nuisance candidate nga nagdala gihapon sa bansagong Martinez.

Aron makagukod, gihimo sa taas nga hukmanan nga “immediately executory” ang mao nilang hukom apan unsa pa may mahimo ug mabuhat ni Tining ning maong hukom nga lima ka buwan sa dili pa ang Hunyo 30. (ikeiidurano@ymail.com)