Mga kriminal nahadlok, gustong manguli:pulis

GIBATI og kahadlok ang uban nga gidudahang mga mangunguot nga ania sa Sugbo tungod sa umaabot nga Sinulog sa kabalaka nga sila patyon sama sa usa ka gidudahang mangunguot ug esnatser nga taga Basilan.

Si Richard Mañala, 40,gipusil sa duha ka mga tawo ug namatay samtang siya naglakaw padung sa pantalan sa dakbayan sa Sugbo pipila ka mga oras human siya buhii sa Theft and Robbery Section (TRS).

Kini samtang si Cebu City Police Director Patrocinio Comendador niingon nga ang nahitabo kang Mañala nga ang Sugbo di luwas ug kuyaw alang sa mga kriminal.

Hinuon, iyang gitataw nga ang tanang mga anggulo sa pagpatay kang Mañala ilang gisusi, apil na niini ang vigilantes.

“Let this be a warning that they (criminals) should not disrespect the (Sinulog) festivity by their activities,” siya nagkanayon.

Samtang, si Insp. Michael Bastes, hepe sa TRS, niingon nga ang gidudahang mga mangunguot nga ilang nasikop ug di taga Sugbo, gusto na lang mamauli sa ilang dapit sa kabalaka nga sila ang isunod.

Ang mga sakop sa TRS sukad sa milabayng adlaw nakasikop na og unom ka gidudahan nga mga mangunguot nga nagsuroysuroy sa siyudad ug nagpaabot sa ilang mabiktima.

Mga suspek giilang sila si Allan Melchora Gomez, alias Botyok, taga Davao;Chitong Quesan ug Gloria Lausa, pulos taga Villabulcita Bulacao, siyudad sa Sugbo.

Laing tulo nga nasikop nga taga siyudad sa Ormoc giilang sila si Francisco Buenaflor, Edgar Albano ug Dennis Abellana.

Sila pasakaan lang og mga kasong vagrancy, apan gipaabot nga mabuhian ra dayon kay menor nga krimen ra man ang ilang nahimo.

Matod ni Bastes nga di niya mabasol kadtong gidudahang mga esnatser ug mangunguot nga mamauli tungod sa kahadlok.

Gitanyagan pa ni Bastes ang mga mangungu-ot nga mamauli sa ilang dapit ug hatagan kini og pamlite, apan namalibad kay may kwarta sila nga ikaplite sa pagpauli.

Bisan pa man sa pagpamauli sa ubang gidudahan nga mga mangunguot, gipahibawo usab ni Bastes nga nangabot na sa Sugbo ang ubang grupo sa mga kawatan nga gikan sa Mindanao.

Sila anaa mag-abot sa ilang local contacts dinhi sa Sugbo sama sa ilang mga higala ug kaparyentihan.

Adunay uban nga ning-check in sa pension ug lodging houses, hinuon padayon nila kining gi-monitor.

Samtang nagpabilin nga wa pay kabanay nga ni-claim sa lawas ni Mañala nga naa sa St. Francis Funeral Homes.

Sa sayo pa, si Comendador niingon nga hayan si Mañala gipatay sa iyang mga kauban kay nihatag siyag impormasyon sa kapulisan kalabot sa iyang mga kauban nga nangabot sa Sugbo alang sa Sinulog.(JFT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph