GIHUNONG na sugod kagahapon dinhi sa Land Transportation Office (LTO-7) ang pagpatuman sa radio frequency identification (RFID) subay sa pagtuman sa kamandoan sa Korte Suprema.
Nasayran nga niadtong Martes gimando sa labaw’ng hukmanan nga hunungon ang pagpatuman sa RFID ug pagpangolekta og bayad human usab moduso og petisyon ang nagkadaiyang mga partylist group.
Ang mga petitioner nangangkon nga ang pagpatuman sa maong programa usa ka kalapasan sa konstitusyon kay way balaod nga nagtugot alang sa Rfid ug wa sab kini moagi og public bidding.
Matod ni LTO-7 assistant regional director Edgar Catarongan nga niluwat na sila og kamandoan kagahapon nga nagmando sa tanan nilang district offices tibuok Central Visayas nga nagpahunong sa tagging sa Rfid.
Apan matod ni Catarongan nga di una nila i-refund ang bayad niadtong nakalukat na sa Rfid sanglit duna pa may giduso nga position paper ang ilang ulohang buhatan.
Matod ni Catarongan nga kon paboran sa Korte Suprema ang petitioner, una pa nila i-refund ang nabayad niadtong nakakuha sa RFID tag.
Apan kon mopabor kanila ang hukom, ipadayon gyud sa LTO ang tagging sa RFID, ang bag-ong ID system sa mga sakyanan nga gitumong alang sa kaluwas sa mga sakyanan ug kahapsay sa transportasyon sa nasod.
“Amo nang gi-orderan ang tanan namong district offices nga hunungon until further notice,” nagkanayon si Catarongan.
Nasayran nga gisugdan sa LTO ang pagpakuha sa RFID sa tanang mga sakyanang magparehistro sugod ning tuiga sa kantidad nga P350.
Matod ni Catarongan nga di pa hinuon nila matino kon pila na ka mga car owner sa Central Visayas ang nakakuha sa RFID ug pila na ang ilang nakolekta sanglit binuwan man ang ilang himuong reporting. (CPL)