BISAN kon moduso pa og motion for reconsideration si 4th district Rep. Benhur Salimbangon, si kanhi Bogo City Mayor Celestino “Tining” Martinez III molingkod na gyud sa iyang katungdanan isip kongresista sa nahisgutang distrito.
Kini tungod kay ang kamandoan sa Korte Suprema nga nag-ila kaniyang tinud-anay nga mananaog pagka-kongresista alang man sa dinaliang pagpatuman.
Apan, si Salimbangon sa interbyu sa sibyaanang Super Radyo, niingon nga di pa mahimong moasumer si Martinez kay mosang-at pa siyag motion for reconsideration.
“Naa pa man tay motion for reconsideration. Di ingon ana kasayon siya mo-assume,” pasabot ni Salimbangon.
Kagahapon gikatakdang manumpa isip kongresista sa kuwarto distrito si Martinez kang House Speaker Prospero Nograles ug kang Sen. Noynoy Aquino, presidential candidate sa Liberal Party diin sila sa iyang pamilya nakig-alyado.
Apan di lang pag-take oath ang gustong buhaton ni Martinez kon di ang mismong pag-take over.
Matod sa gideklarang kongresista nga siya na ang motunga sa Kongreso kon mo-resume kini karong Enero 22.
Si Martinez sa interview sa CCTN kagahapon sa buntag niingon nga way kasudlan sa iyang kalipay human nasayran ang desisyon sa Korte Suprema kay namatud-an gyud niini kon kinsa ang nanikas kanila ni Salimbangon sa 2007 elections.
Di niya igsapayan kon mubo nalang ang panahon sa iyang panglingkod kay ang importante nigawas ang kamatuoran ug kini dako og ikatabang sa iyang subling paglansar karong umaabot 2010 elections.
Masaligon usab siya nga bisan kon mopasaka pa og reconsideration si Salimbangon, di na mausab pa ang hukom sa Korte Suprema sanglit ang gipagawas nilang hukom giuyonan man gyud sa tanang 14 ka mga huwes ug way bisan usa kanila ang nisupak.
“Nalipay kaayo ko kay after everything that has happened we feel very much vindicated gyud sa panghitabo and I hope this will put to rest all the doubts ug kining pagbinayloay og estorya kinsay nanikas kay klaro naman gyud kaayo ni kay gikan naman ni sa Supreme Court, ang high court. All the justices signed it without dissenting opinion so it would be very futile to file motion for reconsideration but katungod mana niya,” nagkanayon si Martinez sa TV interview.
Si Salimbangon sa iyang bahin niingon nga ilang kuwestiyunon ang hukom pinaagi sa pagduso og mosyon.
Kagahapon usab gikatakdang mopasaka og mosyon si Salimbangon ug ilang gitinguha nga ang resulta nga naa sa Ccimpel maoy iphon og balik ug dili ang naa sa Comelec kay siya nagtuo nga tampered na kini.
Si Salimbangon nipasangil nga “fake ballots” giapil sa pag-ihap.
Si Martinez maoy nigawas nga mananaog dihang ang kapin sa 5,000 nga gikonsiderar nga stray votes giihap pabor kaniya.