DEAD on arrival sa balay tambalanan ang usa ka gituohang suspetsado sa sunod-sunod nga pagpanulis ning siyudad human napusilan sa pulis Miyerkules mga alas 1:30 sa kadlawon sa Vamenta Boulevard, Carmen ning siyudad sa Cagayan de Oro.

Ang wala mailang suspetsado unang namusil sa mga pulis nga nagpatrolya niadtong tungora nga mao sila si Senior Police Officer 1 Presco Panen ug Police Officer 3 Bernabe Belotendos sa Police Station 4 (PS4) sa Carmen.

Sa gihimong pakighinabi sa Sun.Star Superbalita ngadto kang Police Chief/Inspector Michael Jhon Deloso, hepe sa PS4 iyang gisaysay nga nagpatrolya niadtong tungora ang iyang sakop subay sa gilusad nga checkpoint alang sa gun ban.

Apan atol sa patrolya, tulo ka mga babaye ang nipara sa sakyanan sa pulis ug nireklamo nga adunay duha ka mga lalaki nga nipara kanila ug nanion og pistola gikan sa usa ka videokebar.

Tungod niini dali nga miresponde ang kapulisan ug nasapon nila ang duha ka wala mailang suspetsado nga nag-iyahay og dagan.

Usa sa suspek ang armado og sundang samtang ang usa adunay dala pistola. Nakasibat ang lalaking nagdala og sundang.

Gigukod sa mga pulis ang suspetsado nga nagdala og pistola apan tungod kay gikapoy naman ang suspek sa sige og dagan nihunong kini ug naapsan sa patrol.

Nikanaog si Panen gikan sa patrol apan na out balance kini hinungdan nga naligid sa kalsada ug gitionan kini og pistola sa suspek nga giingong nagkatawa pa niadtong tungora ug suwerte na lamang dihang wala mibuto ang pusil sa suspek.

Samtang si Belotindos niadtong tungora nga nakita ang suspek nga pusilon na si Panen iya dayon nga gipusil hinungdan sa pagkaigo sa dughan niini. Mibalos usab pagpusil si Panen hinungdan sa pagkatumba niini.

Nakaangkon og ubay-ubay ka mga samad pinusilan sa dughan ug sa pantog ang biktima nga maoy gituohang hinungdan sa hinanaling kamatayon.

Gidala pa sa mga pulis sa JR. Borja Memorial Hospital apan dead on arrival nga gideklarar sa doktor.

Matud ni Deloso nga ning panahona wala pay ni-claim sa patayng lawas sa biktima nga gidala na ngadto sa Bollozos funeral parlor.

Padayon pa ang ilang gihimong imbestigasyon labina nga adunay nitumbok niini nga maoy suspetsado sa sunod-sunod nga pagpanulis ning siyudad. Nitumaw usab ang taho nga bag-ong laya ang biktima sa prisuhan.

Dugang ni Deloso nga wala siyay nakitang sayop nga gihimo sa iyang mga sakop sa pagpusil sa biktima tungod sa gihimong pagsukol niini sa mga otoridad.

Gikustudya sa kapolisan ang .38 kalibre niini alang sa ballistic examination nga adunay sulod unom ka live ammos, nagkalain-laing yabe nga posibleng gigamit sab sa pagpangarnap.

"Dili ta mag undang sa pag-imbestigar hangtod dili nato mahibaw-an asa nagikan ning tawhana ug ang mga gikalimbigitang krimen niini," ni Deloso.