USA ka drayber sa traysikad ang gipusil-patay sa usa ka pulis sa Sitio Calumpang, Barangay Poblacion West, lungsod sa Moalboal, alas 3:00 sa kaadlawon kagahapon.
Ang biktima mao si Delgado Sab-a, 31, dunay kapuyo, drayber og traysikad ug nagpuyo sa Barangay Poblacion East samang lungsod.
Ang biktima naigo sa tiyan ug gidali pagdala sa ospital sa silingang lungsod sa Badian apan gideklarar nga dead-on-arrival (DOA).
Si PO3 Edwin Illut, desk officer sa Moalboal Police nga nahinabi sa dySS Super Radyo ug Sun.Star Superbalita, nagkanayon nga nakadawat sila og alarma bahin sa armadong tawo sa maong dapit.
Apan pag-abot sa ilang mga kaubanang pulis, si Sab-a gikatahong napusilan na ni PO1 Sofialin John Pableo, 27, minyo sakop sa Dumanjug Police Station, kinsa bag-o lang naabot gikan sa duty.
Gidali nila sa pagpasakay sa ambulansiya ug gidala sa tambalanan sa Badian apan gideklarar nga DOA human wala makaagwanta sa samad pinusilan sa iyang tiyan gikan sa bala sa 9mm pistol ni PO1 Pableo.
Ilahang nakuha sa possession ni Sab-a, ang usa ka .38 revolver nga may duha ka buhing bala samtang, si PO1 Pableo bulontaryong nitahan sa kapulisan sa Moalboal.
Matod ni PO3 Illut, usa ka concerned citizen maoy nitaho kanila kabahin sa armadong tawo nga nagpahipi sa ngitngit duol sa panimalay ni PO1 Pableo.
Dugang nakuha sa imbestigasyon sa kapulisan, si Sab-a giingong ‘napasmo-pasmo’ tungod sa pagsigeg inom ug walay kaon.
Ang kapulisan sa Moalboal mopalawom sa ilang imbestigasyon.
Laing nasayran sa kapulisan nga ang amahan ni PO1 Pableo, kanhi pulis, napatay kini didto sa lungsod sa Alcantara dihang gi-ambusan pipila na katuig ang nakalabay.
Si PO1 Pableo, nahinabi sa dySS Super Radyo ug Sun.Star Superbalita, niingon nga wala siya magtuo nga may kalambigitan kini sa pagpusil-patay sa iyahang amahan.
Gipadayag niini nga posibli dunay tawong gikalagutan si Sab-a sa ilang dapit o kaha mangawat kini hinungdan nga diha sa ngitngit duol sa iyang panimalay nagpahipi.
“Pag-abot nako sa amoa sakay sa akong motorsiklo gikan sa duty, kaadlawon na mipahibalo akong silingan nga ayaw kompiyansa kay dunay armadong tawo diha nga nagpahipi,” dugang ni PO1 Pableo.
Wala sila maglangay nitawag gilayon siyag back-up sa Moalboal Police Station nga gitawgan sab sa ilang mga silingan kabahin niini.
Gisuhid gilayon niya ang lugar diin nagpahipi ang maong tawo sa pag-abot niini nakalakaw na kinig pipila ka dupa gikan sa ilahang panimalay hinungdan nga gitawag niya.
u2018Kinsa man ka? Kinsay pangalan nimo? Nganong naa man ka diha sa ngitngit!, pero kalit nga miatubang kaniya dayon bunot sa armas aron unta siya pusilon apan naunhan niya kay nangandam na siyang daan,” dugang ni PO1 Pableo.
Gipadayag niini nga wala gyud siya mokumpiyansa niadtong higayuna kay nagtuo siya nga dautang tawo gyud ang iyahang ikabagat hinungdan nga dali siyang naka-self defense.
Giklaro niini nga wala gyud siya makaila kang Sab-a, ug pagkabuntag nalang niya nahibaw-an nga taga pikas Barangay hinungdan nga nagtuo siya nga dunay laing dautang tuyo diha sa lugar.
Pero wala siya magtuo nga siyay target niini apan bisan pa man, wala silay kompiyansa gi-safety niya karon ang iyang pamilya samtang siya nitahan sa Moalboal police.