USA ka babaye ang nahagbong sa iyang gisakyang motorsiklo sa di pa masutang hinungdan samtang pauli na unta kini didto sa lungsod sa Magsaysay, Davao del Sur.
Nahitabo kini mga alas 6:30 ang takna sa gabii niadtong Martes didto sa Barangay Rizal, sakop sa lungsod sa Bansalan, Davao del Sur.
Subay sa gipagulang taho sa traffic section sa Bansalan Police Office, usa ka George Fuentes, minyo ug taga barangay Poblacion, Magsaysay, ang nipahibawo sa ilang buhatan.
Si Senior Police Officer 1 John Mark Estremos, nag-imbestiga sa hitabo, nagkanayon nga nailhan nila ang maong babaye nga mao si Gereda Timtim, kinsa nagsakay sa Honda Dream nga gimaneho ni Anastangkloy Navares.
Matod sa taho ni Estremos, gikanayon kanila ni Fuentes nga nasundan niya ang maong motor ug nakit-an nga nahagbong ang maong pasahero mao nga kalit siyang naka-preno niadtong higayona.
Apan, nabalintong na hinuon si Fuentes sa Suzuki Raider nga motor diin iyang gisakyan mao nakaangkon sab siya og mga pangos sa nagkadaiyang parte sa iyang kalawasan.
Dugang ni Estremos nga wa pa sila makaila sa drayber nga gisakyan sa maong babaye sanglit kalit kining nahanaw didto sa lugar.
Gihatod na sab ang biktima ngadto sa wa matinong bay tambalanan sa siyudad sa Digos human giingong nagkadugo gyud ang ulo niini.
Padayong gisubay sa kapulisan ang nahitabo didto sa lugar kagahapong adlawa.(Dondon Dinoy)