ANG buhatan sa Commission on Election (Comelec) dinhi sa probinsya sa Davao del Sur nagsugod na sa Precinct Count Optical Scan (PCOS) demo ngadto sa publiko sugod kagahapong adlawa.

Unang nakabenipisyo niini mao ang lungsod sa Bansalan, Davao del Sur diin gihimo ang demo didto sa University of Mindanao Hall.

Gitataw ni Lawyer Maria Febes Barlaan, nga gipakita nila ngadto sa publiko kun unsa ang mga proseso sa pagboto sa automated elections gamit ang mga counting machines sa piliay karong Mayo 2010.

Karon pa lamang gipasabot na sa Comelec ngadto sa mga botante ang pagka-mahinugdanon nga makat-on sa counting machines ingon man ang pagboto nga sayon ra kaayo sukwahi sa mga niguwang hungihong nga malisod ang pagboto sa maong gamit.

Gipakita sab sa Comelec ngadto sa publiko nga di mamahimong matikasan ang eleksyon karong tuiga sanglit daghan og password gikan sa mga Board of Election Inspector's (BEIs) ang masulod sa counting machine pinaagi sa touch screen finger.

Apan, nasuta nga dako gyud og kalainan ang proseso sa pagboto karong tuiga sanglit gitakdang mag-abri ang matag presento alas 7 pa lamang sa buntag ug magsira kini alas 6 sa gabii sukwahi kaniadto nga kutob lang alas 3 sa hapon.

Sigun sa Comelec, mahitabo sud sa 2 minutos ang vote transmission ngadto sa mga canvassing centers diin nianang adlawa gihapon i-proklama ang mga nidaug sa lokal ug probinsyal nga posisyon.

Dason sa Comelec nga di sab makahimo ang pagkawat og data ang mga hackers gumikan sa kapaspas ug daghan kaayong encryption sa mga data.

"We have 128 bit encryption, so mahihirapan talaga ang mga hackers dito," pasabot ni Barlaan.

Gihangyo na lamang sa Comelec nga gawas sa luwas ang boto sa katawhan, gikinahanglang mamintinar sa kapulisan ug kasundaluhan ang kahapsay'g kalinaw sa matag dapit nga ilang gibantayan aron di mahisama sa Maguindanao.

Gihimo sab niadtong adlawa ang voters registration forum ug candidates forum diin giyagyag sa matag kandidato sa lugar ang ilang mga plataporma ngadto sa katawhan. (Orlando B. Dinoy)