GRUPO ni Kumander Ameril Umbra Kato sa 105th Base Command sa Moro Islamic Liberation Front (MILF) group maoy gitudlo nga suspek sa katag-katag nga pagpangatake sa probinsiya sa Maguindanao.
Basi sa taho gikan sa Maguindanao Police Provincial Office, nga alas 8:40 sa gabii, Enero 17, gisulong sa gibana-banang 20 ka mga Lawless Moro Islamic Liberation Front Group (LMG) ang pinuy-anan ni Hudito Unao, barangay Chairman sa barangay Limpongo, Datu Hopper Ampatuan.
Ang panimalay sa barangay kapitan gipaulanan og mga bala sa mga suspetsado gamit ang mga tag-as nga armas.
Bisan samdan si Unao, nakahimo pa kini sa pagkuha sa iyang M14 rifle ug misukol sa mga armado.
Miatras lamang ang mga rebelde dihang nagsing-abot na ang dugang puwersa sa militar ug kapulisan.
Luwas ang pamilya ni kapitan Unao, apan nasamdan siya sa iyang bukton ug likod.
Apan luwas na kini human gipatambalan didto sa Maguindanao Provincial Hospital.
Giklaro ni MILF Civil Military Relation Chief Eid Kabalu nga walay kalabutan ang ilang organisasyon sa engkwentro.
Sumala niya nga personal kadto nga away sa uban nilang field commander gumikan sa yuta nga gi-ugmad ni Unao, kinsa lider sab sa mga Citizens Armed Forces Geographic Unit (Cafgu) sa Datu Hooper Ampatuan.
Nagpakatag na si 6th Intfantry Division Chief Major/General Anthony Alcantara og dugang puwersa sa militar sa munisipyo sa Datu Hooper aron malikayan ang pag-ulbo sa dakong kagubot tali sa magka-away nga grupo. (Edgardo Fuerzas)