GIUSIKAN lang sa usa ka 17 anyos nga lalaki ang iyang maayong ugma tungod kay gikutlo niini ang iyang kinabuhi pinaagi sa paghikog human sila nakalalis sa iyang hinigugma niadtong Martes.

Ang nagpakamatay giila sa kapulisan nga mao si Rasel Simbre, 17, out-of-school youth, nagpuyo sa Purok 15, Villahermosa Village, Upper Barangay Wangan, Calinan District, siyudad sa Davao.

Si Police Officer 3 Orlando Madrazo, duty investigator sa Calinan Police Station, nagbutyag sa iyang spot report nga ang biktma napalgan sa iyang igsuong lalaki nga si Rodel.

Si Rodel nakurat dihang iyang nakita ang iyang maguwang nga nagbitay sa kahoy mga 70 metros ang gilay-on gikan sa ilang balay sa alas 11:30 sa buntag niadtong Martes.

Ang maong insidente gipahibalo dayon ni Rodel sa ginikanan kinsa nangayo sab og police assistance aron imbestigahan ang ang maong hitabo.

Si Doris, inahan sa biktima, nagbutyag sa kapulisan nga Lunes sa gabii iyang nasayran nga naglalis ang biktima ug ang iyang hinigugma nga si Endy, 16, nagpuyo sa Purok 15, Villahermosa Village.

Ang panaglalis, suma sa inahan sa biktima, gikaguol pag-ayo sa namatay mao nga nag-inom kini hangtud nga nahubog ug nianang pagkabuntag ila nalang napalgan nga nagpakamatay.

Atua karon gihaya ang biktima sa Angel Funeral Homes sa Calinan samtang giandam ang iyang katapusang pahulayan. (AD)