2 misis sakpan
DUHA ka mga ginang ang nasakpan sa ilang bana sulod sa motel nga dunay kauban nga laing lalaki sa duha ka managlahing higayon dinhi sa siyudad sa Davao.
Ang labing uwahing nasakpan sa alas 11:00 pasado sa gabii niadtong Martes gitago sa Superbalita sa pangalan nga Arlyn, 35, minyo, nagpuyo sa Green Pasture Village, Catitipan, Buhangin, ning siyudad.
Si Arlyn nasakpan sa akto sa iyang bana nga dunay gikauban nga laing lalaki sulod sa Touchstone Lodge nga nahimutang sa San Pedro Extension, ning siyudad.
Ang bana nga gitago sa pangalan nga Pedro, 47, nagbutyag sa Superbalita nga dugay na siyang natahap sa iyang asawa nga dunay gikabuangan nga laing lalaki mao nga iya kining gipanid-an.
"Dugay na ko nagduda nga nagluib ang akong asawa. Mga alas 10:00 sa gabii, akong namatikdan nga migawas siya sa balay mao nga misakay ko og taxi ug ako siyang gisundan. Miadto siya sa NHA Buhangin kay mipalit og tambal. Akong nakita nga miabot ang lalaki unya misakay sila og jeep. Misulod sila sa lodge mao nga nanawag ko og police assistance," pahayag ni Pedro.
Mga sakop sa San Pedro Police Station miresponde dayon ug didto ilang gisulod ang lodge dayon gitoktok ang lawak nga gisudlan ni Arlyn ug sa lalaki niini nga nailhan sa pangalan nga Noel (apelyido gitago), 41, security guard sa Fireball Security Agency ug nagpuyo sa Barangay Matina Pangi.
Sila Arlyn ug Noel gipagawas sa mga pulis gikan sa lawak sa lodge ug gibilanggo sa selda sa kapulisan sa San Pedro tungod sa kasong adultery.
Alas 10:00 buntag kagahapon, naabtan sa Superbalita nga miabot ang bana ni Arlyn uban sa ilang dalaga nga anak ug naghangyo sa kapulisan nga pagawason ang iyang pinangga
nga asawa.
Samtang gipaguwa sa selda sila Arlyn ug Noel gibati og dakong kalipay ang duha sanglit dili na sila mabilanggo sa dugay nga panahon kung ipasaka na ang kasong adultery ngadto sa korte.
Si Pedro nagbutyag atubangan sa iyang asawa ug sa lalaki niini nga mopasaka siya og kaso kung masakpan niya pag-usab ug magpadayon ang ilang relasyon.
"Kanunay ni silang mag-inom ug close kaayo sila kay naa diay relasyon. Ako ray ilang bantayan!," pahayag ni Pedro atubangan sa mga pulis ug Superbalita.
Si Arlyn ug Noel nagbutyag sa Superbalita nga nalipay sila nga gipagawas sila ni Pedro. Si Noel miangkon nga usa na ka tuig ang ilang relasyon ni Arlyn.
Gawas sa duha nga nasakpan sulod sa lodge, nasakpan sab ang usa ka negosyante sa iyang bana sulod sa Room 104 sa Royal Downtown Inn sa dalang San Pedro sayo sa kabuntagon niadtong Enero 8, 2010.
Ang ginang gitago sa pangalan sa Superbalita nga si Janet, hamtong ang pangidaron, dunay negosyo dinhi sa siyudad.
Si Janet gisikop sa kapulisan sa San Pedro Police Station human nagpakitabang ang iyang bana nga gitago sab sa pangalan nga Dennis.
Si Dennis nagbutyag sa kapulisan nga iyang nakita ang iyang asawa nga dunay gikauban nga lalaki sulod sa maong motel mao nga miresponde ang mga pulis nga gipangulohan ni Police Officer 2 Rogelio Doble.
Pag-abot sa mga pulis, ilang nakita nga wala nay sapot ang negosyante gawas sa gitapis niini nga tuwalya sa iyang lawas dihang miatubang sa mga otoridad.
Ang ginang maisugon nga nangutana sa mga pulis kung unsay problema kauban ang lalaki nga gipanganlan sab og Dennis, apan wala na kini nakatingog dihang iyang nakita ang iyang bana, sigun ni Police Officer 2 Doble.
Ang kasong adultery gipasaka na sa City Prosecution Office (CPO) apan nakapiyansa sab dayon ang duha ka mga gidemanda.