LISOD apan determinado ang numero unong babaye nga marathoner sa Pilipinas nga si Mary Joy Tabal nga maka-qualify alang sa 2016 Rio Olympics.

Ang Olympic qualifying time mas paspas og unom ka mga minutos sa personal best ni Tabal apan malaumon ang produkto sa Southwestern University nga makakuha niini pinaagi sa paggiya sa iyang dugay nang coach nga si John Philip Dueñas ug suporta sa Philippine Amateur Track and Field Association (Patafa).

Naghimo na karon ang hepe sa Patafa nga si Phillip Ella Juico og programa alang kang Tabal inubanan sa Sea Games silver medalist nga si EJ Obiena ug gold medalist Eric Cray alang sa pangandoy niining makadagan sa Olympics.

Sa interbyu sa Sun.Star Cebu, igsuong buhatan ning mantalaan, nagkanayon si Tabal nga malipayon siyang naapil siya ning maong programa. Gipasabot ni Tabal nga dili tanang sakop sa Philippine national team ang paapilon niini.

Ang two-time Milo Marthon queen kinsa naghupot sa iyang personal best nga 2:48 nagkanayon nga malipayon siya nga pareho sila og tumong sa Patafa alang sa iyang damgo.

Ang qualifying time alang sa Olympics kay 2:42 alang sa lumba sa mga babaye.