GIPAKITA sa kampo ni Mexican Francisco “Chihuas” Rodriguez kon unsa kini ka seryuso sa ilang tinguha nga pusgayon ang gingharian ni World Boxing Organization (WBO) flyweight champion ALA fighter Donnie “Ahas” Nietes.

Si Rodriguez, kinsa adunay 17-2-1, 11KOs nga rekord, gikatahong ania na sa nasod, mga duha ka semana sa dili pa kini mosuway pag-ilog sa korona ni Nietes karong Hulyo 11 sa laing edisyon sa Pinoy Pride boxing series sa Waterfront Hotel sa Lahug, Cebu City.

Ang ALA Promotions, nga maoy nagpasiugda sa promosyon kaabag ang television giant ABS-CBN, nagtuo nga misayo og anhi si Rodriguez aron maanad na kining daan sa klima sa nasod.

“This is a sign kon unsa sila ka serious about this fight,” matod ni ALA Promotions Michael Aldeguer.

Giklaro ni Aldeguer nga wala siya masayod kon asa karon si Rodriguez ug ang iya lang nahibaw-an nga niabot na kini sa Manila.

“Dili man sila manubag sa among tawag. Ang naa gud sa contract is next Monday pa sila mangabot diri pero ni-decide sila nga mosayo pag-anhi,” pasabot ni Aldeguer.

Si Nietes, kinsa adunay 35-1-4, 21KOs nga rekord, mao ang naggunit sa rekord isip Pinoyng boksidor nga labing dugay’ng naggunit og world title.

Sayo ning tuiga iyang nabuak ang rekord ni boxing legend Gabriel “Flash” Elorde nga pito ka mga tuig ug tulo ka mga buwan.