SA katapusang higayon nga adunay midaog og back-to-back MVP awards sa Philippine Basketball Association (PBA), si Danny “Lakay” Ildefonso maoy bida.
Paglabay sa 14 ka mga tuig, hayag na’ng adunay makasunod sa nahimo ni Ildefonso ug duol kini sa iyang dunggan – ang Sugbuanong higante nga si JuneMar Fajardo.
Si Ildefonso, kinsa midaog og back-to-back MVP niadtong 2000 ug 2001, nagkanayon nga dili siya masurpresa nga maangkon sa San Miguel Beermen center ang ikaduha niining sunodsunod nga MVP title karong tuiga.
Ang 6’10” nga produkto sa University of Cebu (UC) Webmasters ug lumad nga taga Pinamungajan, Cebu wala na’y kontra alang sa inilugay sa MVP award, matod pa ni Ildefonso.
“Bigay na nila, wala naman siyang kalaban,” matod pa ni Ildefonso sa interbyu sa Spin.ph human gipangmakmak sa Beermen ang Meralco Bolts, 102-86, niadtong Liunes sa gabii aron angkunon ang katapusang luna sa semi-finals sa PBA Governor’s Cup.
Duol-duol unta nga kompetensya ni Fajardo si Jason Castro apan nanamilit na man ang team niini nga Talk N’ Text Tropang Texters.
Alang kang Fajardo, ang mas importante kaniya mao ang maagak pagbalik ang Beermen sa kampiyunato ug ikaduha na lang individual award.
Si Ildefonso usa sa nakatabang paghashas sa abilidad ni Fajardo dihang nagkauban sila sa Beermen.