PIPILA na sa mga namaligya og pirated nga mga DVD ug CD dinhi sa Davao del Sur ang nakakuha og kopya sa 'Maguindanao Massacre' ug ubay-ubay na sab ang nakapalit niini.

Apan, wala'y bisan usa sa mga mamaligyaay nga magpataka og baligya niini sanglit anaa gihapon sa ilang dughan ang kabalaka.

Didto sa lungsod sa Bansalan, aduna sa'y mga lalaking naglibot-suroy sa maong CD.

Aminado sab ang pipila ka mga molupyo sa lugar nga nakakita na sila sa kapin kun kulang tulo ka oras nga pag-video sa pagkalot gamit ang backhoe sa 57 ka mga tawong gipamatay didto sa Ampatuan, Maguindanao niadtong Nobyembre 23.

Usa sa mga nakapalit nga si Arceli (apilyedo gipugngan), nagpahayag nga ngilngig kaayo ang gihimo sa mga biktima ilabina kay lawom kaayo ang gilubngan sa mga gipamatay.

Matod niya nga labihan ka linoog ang krimen tungod kay bisan ang mga sakyanan, giapil og lubong bisan naa pa sa sulod ang ubang sakay niini.

Di na mahitsura ang mga tawong gipangkalot human nangabali ang nagkadaiyang parte sa ilang kalawasan.

Bisan mga batang menor, nakapalit sab sa maong kopya ug sa ilang linghod nga pangedaron, nakita nila ang ngilngig nga kasinatian sa mga biktima nga way kaluoy nga gilubong human gipatay.

Si Inday, kinsa taga Barangay Poblacion sa dapit, nagkanayon nga wa nay angay pang ilimod ang mga gipangdakop nga suspek human ilang nakita sa video ang backhoe nga dunay tatak nga 'Province of Maguindanao, Governor Andal Ampatuan Sr.'

Apan sa bahin sa kapulisan, gitataw ni Police Chief Inspector Solomon De Castilla, hepe sa kapulisan, sa dapit nga di nila mahimong dakpon ang mga namaligya sa maong CD sanglit wa pa silay nadawat nga mando sa pagpaundang niini.

Hinuon, aminado ang kapulisan nga wa pa sila makakita sa duha ka adlaw nga video sa pagkalot sa tanang biktima sa maong masaker.(Dondon Dinoy)