UPAT ka mga lalaking gipangita sa balaud ang nasikop sa kapulisan didto sa lungsod sa Sta. Cruz, mga alas 9:00 sa buntag, Enero 13.
Si Police Officer 3 Eric Ramos, operation officer sa Davao del Sur Provincial Police Office (DDSPPO), nag-ila sa mga dinakpan nga mao sila si Ronnie Leones, 34; Raul Algabre, Sabino Cueva, 60 ug Guillermo Talinting, pulos minyo ug taga Barangay Bato sa nahisgutang lungsod.
Matod ni Ramos, gipangulohan ni PO2 Carmelo Caputolan, warrant officer sa lugar ang pagbitbit sa orden de aresto nga gipagula ni Municipal Trial Court Judge Anita Mabote-Fernandez batok sa mga akusado.
Giingon niini nga nakadoket ang kaso sa mga suspek ubos sa criminal case number 4787-09 ilawom sa Comprehensive Municipal Ordinance number 04-2006 kon illegal fishing.
Matod ni Ramos nga temporayong gikustodiya na sa kapulisan ang mga dinakpan samtang gihuwat ang pagtunol niini ngadto sa korte.
Nagpasidaan ang kapulisan nga likayan gyud sa mga mangingisda ang ilegal nga pagpanagat aron di mag-atubang og suliran sa ilang panginabuhi. (Dondon Dinoy)