USA ka makusog nga pagbuto sa granada ang miuyog sa siyudad sa Kidapawan.

Sigun sa taho gikan sa Cotabato Police Provincial Office nga alas 8:40 sa gabii, Enero 13, duha ka wala mailhing mga suspek nga sakay sa motorsiklo ang miitsa og granada sa basketball court sa Sitio Pinantao, Barangay Sudapin.

Apan way nasamdan sa hitabo gawas lamang sa sobrang kahadlok nga gibati sa mga molupyo.

Matud ni Kidapawan City Mayor Rodolfo Gantuangco nga pipila ka minuto ang milabay pagkahuman sa dula nga basketball, mibuto ang eksplosibo sa maong dapit.

Gituohan nga pagpanghadlok lamang ang motibo sa mga suspek kinsa dali nga misibat paingon sa wala matino nga direksyon.

Gidugang ni Kidapawan City Police Director Senior/Superintendent Chino Mamburam nga apil sa anggulo nga ilang gisundan sa pagbuto sa granada mao ang bikil sa matag team.

Gimando na ni Governor Sacdalan ngadto sa kapulisan ang paghimo og imbestigasyon aron masuta ang tinuod nga hinungdan sa hitabo sa ingon nga madakpan ang mga suspetsado. (Edgardo Fuerzas)