NAPULO ug duha ka mga bus sa Davao Metro Shuttle Bus, Inc. ang nasunog sa alas 11:45 sa gabii niadtong Miyerkules didto sa ilang garahe sa Ecoland Drive, siyudad sa Davao.

Base sa blotter sa Talomo Police Station, onse lamang ang gikatahong nasunog apan dihang gipakisayran ang tagdumala sa Davao Metro Shuttle Bus, Inc. dose ka mga bus ang nasunog.

"Dose tanan ang nasunog kay naa pa may usa ka bus nga nasunog, pero mapuslan pa hinuon ni kay pintura ra ang damaged," si Rene Eroy, telephone operator, nagsulti dihang gipangutana kagahapon sa Superbalita pinaagi sa telepono.

Si Senior Police Officer 1 Reynaldo Gustilo, duty investigator sa Talomo Police Station, nagbutyag sa iyang spot report nga pito ka mga bus ang totally damaged, samtang upat ka mga bus ang partially damaged.

Nasayran nga nagsugod ang kalayo sa usa bus nga giayo sulod sa maong garahe ug mikaylap ngadto sa laing mga bus.

"Basin dunay battery o faulty wiring ang hinungdan sa maong sunog kay wala may tawo anang orasa kay gabii naman kaayo tong higayona," pahayag ni Eroy.

Ang sunog napalong sa mga sakop sa Bureau of Fire Protection (BFP) uban sa mga fire volunteers sulod sa 30 minutos nga kombati.

Hangtud sa pagsulat ning balita, wala pa masayri kung pila ang danyos sa tanang bus nga nasunog sa maong insidente.

"So far, wala pa nahibaloan kung pila ang total damaged kay padayon pa kining giditermanar sa mga fire investigators," suma ni Eroy.

Sa laing bahin, usa ka lalaki ang midangat sa tambalanan human siya gipusil sa wala mailhing tawo samtang nag-inom sa ala 1:30 sa kaadlawon kagahapon didto sa Island Garden City of Samal.

Ang biktima mao si Ericson Lacorte, 20, ulitawo, nagpuyo sa Barangay Cogon, Island Garden City of Samal.

Basi sa blotter sa Davao Medical Center (DMC), ang biktima nakaangkon og samad pinusilan sa iyang walang abaga mao nga gipatambalan siya sa iyang mga kabanay sa maong tambalanan.

Mga nagdala sa biktima nagbutyag nga wala pa nila nasayran kung kinsa ang nagpusil sa biktima sanglit kalit ang maong hitabo.

Giimbestigahan na ang maong insidente sa kapulisan sa maong siyudad.