PATAY ang usa mabdos human nabangaan niadtong Miyerkules mga alas 9:20 sa buntag sa Barra lungsod sa Opol, Misamis Oriental.

Giila ang biktima nga mao si Emerlyn Silmahan, 41, minyo, taga Barangay Iponan ning siyudad sa Cagayan de Oro kinsa lima ka bulan nga mabdos.

Si Police Officer 3 Nick Bagas sa Opol Police Station nibutyag sa Sun.Star Superbalita nga wala nakabantay si Silmahan nga adunay usa ka Isuzu pick-up nagdala sa plaka KCY-758 nga naghaguros.

Ang maong sakyanan gimaneho ni Gabriel Louis Baculio, 19, ulitawo, taga Baculio siyudad sa El Salvador ug Sangguniang Kabataan (SK) chairman sa maong siyudad.

Tungod kay wala man nabantayan ni Silmahan ang maong pick-up samtang nitabok deretsong nabanggaan ang biktima hinungdan nga nilagpot kini tunga sa kalsada.

Dali nga gitabang ni Baculio ang biktima nga nagbuy-od sa kalsada ug gidala sa Polymedic General Hospital ning siyudad apan giduso ngadto sa Cagayan de Oro Medical Center.

Pipila ka minuto ang nilabay sulod sabalay tambalanan nakabsan sa kinabuhi ang biktima tungod sa posibleng grabeng niawas nga dugo.

Matud ni Bagas nga wala gikostudya sa ilang buhatan ang driver ning panahona human niini giabaga tanan nga galastuhon sa balay tambalanan.

Hinuon ang imbestigador sa maong kaso padayon pa sa paghimo og dugang imbestigasyon kalabot sa hitabo.