SEMINARON sa Cebu organizing committee sa Asia Pacific Economic Cooperation (Apec) ang mga drayber ug operators sa taxi isip kabahin sa pagpangandam sa dakong kalihokan sugod karong Agusto.
Ang seminar pasiugdahan sa Department of Tourism nga ipahigayon sa Kapitolyo karong adlawa.
Si Provincial Assistant Administrator Ramil Abing, pangulo sa local committee operations, niingon nga sa briefing pasabton ang mga drayber ug operators sa taxi bahin sa kamahinungdanon sa pagpahigayon sa Apec dinhi sa Sugbo.
“So that they’ll be able to understand unsa ning Apec meeting here in Cebu,” siya nagkanayon.
Ang mga drayber tudloan usab sa insaktong pamatasan tungod sa gipaabot nga pagdagsa sa mga langyaw nga turista labi na international media nga tuyong moanhi sa Sugbo gumikan sa mga tigom sa Apec.
Tudloan usab sila unsaon pag-abi-abi sa mga langyawng pasahero labi na kon magpatudlo sa mga lugar nga pahigayonan sa mga tigom sa mga delegado sa Apec.
Tinguha sa local organizing committee nga malikayan ang overcharging sa mga taxi driver sa mga langyawng bisita nga maghatag og bati nga imahe sa Sugbo.