ARON pagsugod sa kasikas, ipahigayon ang unang press conference sa away nila Manny Pacquiao ug Joshua Clottey karong Enero 19, adlawng Martes, sa Dallas Stadium.

Si Lee Samuel sa Top Rank miingon nga usa ka makahuloganon ug mabulokon nga press conference ang ilang himoon. Ang kontrata sa sa pay-per-view fight napirmahan na, matod sa Top Rank Promotions.

Click here for stories and updates on the Sinulog 2010 Festival.

Duha ka stage ang gibuhat alang sa pagsugod sa mga kalihukan sa maong away. Adunay 50 ka mga cheerleaders nga mga cowboys nga mosayaw atubangan sa mga manna-aw ug ingon man mopahigayon og special fireworks display.

Si Michael Buffer maoy mo-host samtang ang tag-iya sa Cowboys stadium nga si Jerry Jones maoy speaker. Sakay sa private plane, si Pacquiao mobiyahe paingon sa New York alang sa press conference nga ipahigayon sa Madison Square Garden sa Enero 20 dayon modiretso kini sa Los Angeles, California.

Gibutyag sa Top Rank nga nagkinahanglan gyud og saktong praktis si Pacquiao tungod kay sukad masukad wa gyud ma-knocked out si Clottey sa iyang mga away. Si Clottey ug Pacquiao pulos ubos sa Top Rank promotions.

Si Floyd Mayweather Jr., kinsa mao unta ang ikontra ni Pacquiao, gikataho nga moaway usab sa susamang petsa.

Gihugonhugonan nga si Paulie Malignaggi maoy posibling ikontra ni Mayweather. Hinuon wa pay kompirmasyon kalabot niini.

Gikatakdang molarga karong Dominggo si Pacquiao paingon sa US aron pagtambong sa press conference. Uban ni Pacquiao mao sila si Michael Koncz, trainer Nonoy Neri, lawyer Jing Gacal ug assistant cook Haplas Fernandez.

Sa di pa molarga, magselebrar una ang Filipino boxer sa adlawng natawhan sa iyang asawa nga si Jinkee sa Paradise Island Beach and Park sa Samal Island.

Ang assistant Filipino trainer nga si Buboy Fernandez atoa na karon sa Wild Card Gym sa Los Angeles uban sa chief trainer nga si Freddie Roach.