HUMAN nidesisyon ang Commission on Elections sa paghatag og exemption sa gipatumang gun ban lukop nasod sa mga sakop sa mga Civilian Volunteer Organization (CVO’s) sa hinungdan nga sila maisip nga mga organic member sa Armadong Kusog sa Pilipinas sa atong kapulisan.

Nitumaw karon ang dakong kabalaka nga kini nag-abli na usab sa “Pandora’s box” nga magpalingkawas sa tanang mga tinunto ug kabuang, mugna sa paglipang sa mga private army kansang loyalty wala sa katawhan kon dili naa sa mga politikong ilang gialagaran.

Click here for stories and updates on the Sinulog 2010 Festival.

Ang paghatag sa diskresyon sa Comelec ngadto sa mga heneral “to police and patrol their own ranks” aron kintahay maseguro nga dili magamit ang maong mga CVO sa pulitikanhong katuyuan, usa ka buslot nga kamanduan nga gipakanaog bisan pa man og daan na silang nasayod og unsay mamahimong lintunganay niining tanan.

Kay kita sayod nga human saAmpatuan Massacre sa Maguindanao diin ang mismong mga CVO’s ang gigamit sa mga Ampatuans sa ilang yawan-ong binuhatan. Apan hangtod karon wala may bisan usa ka opisyal sa kasundaluhan o sa atong kapulisan ang nanubag. Kon sila man ang nagkontrolar ning maong mga CVO nganong tua naman mokuha og mosunod sa mga kaman-duan sa mga Ampatuan kining maong mga para-militias ug unsa may ilang tulubagon sa mga inutil nga mga opisyal ning maong natigayong kabu-ang? Ang nakaporke pa gyud kay maoy ihatag nga ilot-ilot sa katawhan ang kintahay independent investigation body nga giumol sa presidente aron mapuhag na gyud ang kagaw sa private armies.

Dili naman tingali kinahanglang moadto ta sa layo aron ma-ngita sa problema kay mismong atong mga kadagkuan sa kasundaluhan ug kapulisan ang nasayod ning maong maot nga dagway sa kamatuoran nga karon gihalingan na usab ning danghag nga ahensya sa COMELEC. Sarang mga ingredyente sa lain na usab nga hugna sa Hello Garci ug milagrusong panghitabo sa piniliay nga dinhi lang posible sa atong nasud sa Pilipinas.

DELICADEZA

Tungod kay mabutang sa kakuyaw ang nasud kon ugaling way motimon sa Korte Suprema ning krusyal nga panahon sa piniliay, gipamugos gyud karon sa Palasyo sa Malakanyang nga motudlo gyud si Presidente Gloria Macapagal Arroyo og ipuli kang Chief Justice Renato Puno sa iya unyang pagretiro karong Mayo 17.

Kini bisan pa man og mismong Judicial and Bar Council nagdumili sa pagsubmitir og listahan sa mga nominees sarang iyang kapilian. Sa panagsumpaki sa constitutional ban sa paghimo og appointments 60 ka adlaw sulod sa election period ug sa obligasyon sa pagtudlo og replacement sud sa 90 ka adlaw human mabakante ang puwesto sa Chief Justice.

Angayang gamitong basihanan ni Presidenti Arroyo ang delicadeza sa iyang desisyon. Apan ambot og may nahibilin pa bang ni kusing niini sa atong presidente nga molayat naman lang gani sa pagka-Congresswoman, basta ang kadawo sa puwesto og gahom sa gobyerno kahatagan lang sa katagbawan.

(ikeiidurano@ymail.com)