Nalzaro: Pulitika sa Sinulog

KINING garbo sa tawo ug pamulitika usahay mopa­tigbabaw gyud bisan panahon sa Sinulog nga unta angayan kitang tanan magkahi-usa aron pagpasidungog sa Balaang Bata. Ang pag-obserbar sa Sinulog ni­­adtong miaging semana nasambugan og pamulitika sa mga nagkasunging pundok sa mga pulitiko dinhi sa dakbayan sa Sugbo. Una si Vice Mayor Joy Augustus Young misaway nga gigamit ang mga bata sa pagsayaw sa Sinulog hinungdan nga ubos ang performance niini sa National Achievement Test (NAT).

Kon siya ang pabut-on iyang ipahunong ang pagsalmot sa Sinulog sa Kabataan sa dakbayan

aron maka-concentrate ang mga bata sa ilang pagtungha. Wala malipong si Joy Young.

Very young pa man god na siya, maong dili pa kaayo siya makasabot. Ang mga tinun-an sa elementarya ug  sekondarya maoy nanayaw sa nagkalain-aling contingent sa Sinulog.

Bisan ang gikan sa ubang mga lugar sama sa Masbate, Leyte ug Mindanao puro mga estudyante. Kon did-an ang mga bata, kinsa may iyang pasayawon? Ang mga senior citizens. Hinanggaw nang sugyot ni Joy Young. Unya wala siya malingaw sa Sinulog grand parade niadtong miaging Domingo?

MARGOT UG TOMAS

Wala na usab mosayaw si Konsehal Margot Osmeña uban sa Cebu City Hall contingent. Sa dihang ma­yor pa ang iyang bana si Tomas Osmeña, dili gayod mosipyat nga mosayaw si Margot. Apan karon wala na. Kay nagkasungi naman si Mayor Mike Rama, kinsa mao usab ang chairman sa Sinulog Foundation. Pulitika gihapon ang hinungdan.

Atol sa Sinulog grand parade, duna gyuy reserved seat sila si Tommy ug Margot sa VIP section. Apan atol sa misa isip opening sa Sinulog, ang magtiayon didto ra sa ubos nga bahin sa grand stand. Wala sila mosaka.  Unya pagkahuman sa misa ug sa dihang naka-present na ang Cebu City contingent, nanglakaw nang duha. Wala na mosaksi sa La Torta contingent sa Argao diin si Gov. Gwen Garcia mao ang lead dancer.

GWEN

Sa iyang pag-ikid-ikid sa stage uban sa La Torta contingent, morag angel si Gwen nga mikonsad gikan sa langit. Maanyag ug makabibihag kaayo siyang tan-awon sa iyang gisul-ob nga gown. Makita sa iyang panagway ang  pagkamalipayon. Miabot siya sa atubangan sa stage nga nagsakay og karwahe. Imported pa tong kabayo nga nagguyod sa karwahe.

Pagkahuman usab niya og sayaw., misakay gihapon siya sa maong karwahe. Samtang misayaw si Gwen, usa sa atong kauban sa media mi-ingon: “Dili lang unta kutob sa sayaw si Gwen isip halad sa Sto. Nino. Maghinolsol usab  unta na siya.”                           

(bobby.nalzaro@yahoo.com)