Renato S. Pono, Sr.

Mantuyong, Mandaue City

MISINGGAAK si Ignacio, “Dili!” Milagingling ang iyang tingog sulod sa lawak nilang magtiayon. “Di mahimo nga pakatawhon ang gisabak sa atong anak, Elvira!”

“Unsay atong buhaton, Ignacio?”

Click here for stories and updates on the Sinulog 2010 Festival.

“Ipakuha nato ang iyang gisabak! Atong ipalaglag! Nasayod ka ba, Elvira, og unsay epekto kon di nato kini buhaton? Dako kining santako sa atong pagka tawo! Inila kita sa atong katilingban ug labaw sa tanan, tinahod!”

Si Jackie ang kamanghuran nga anak nilang Ignacio ug Elvira. Napulog unom pay panuigon ug naa pa sa ikatulong tuig sa hayiskol.

Tulo lamang ang mga anak sa magtiayon. Ang kinamagulangan, si Cheche, usa ka propesyonal ug naminyog American navy. Tua sa Amerika sila namuyo. Si Mackie usab gradweting sa ‘nursing’ sa inilang unibersidad dinhi sa Sugbo.

Nagmata sa kaharuhay ang mga anak nilang Ignacio ug Elvira. Dako ang negusyo sa ilang amahan. Mao usab si Elvira nga tag-iyag dakong tindahan sa ‘fashion accessories’ sa siyudad.

Sa ilang ka-bisi sa negusyo nataligam-an sa magtiayon ang pag-asikaso sa ilang kinamanghurang anak nga si Jackie. Miapil kinig ‘banda’ diin si Jackie maoy ‘vocalist’ kay maayog tingog. Kanunay silang mabuntagan sa panahon nga adunay imbitasyon silang tambungan. Maayo silang manukar. Daghan ang moabiba kanila. Gabii na usab silang mopauli sa higayon nga sila si Jackie ug ang iyang mga kauban magpraktis sa ilang pagtukar. Hangtod nga nimabdos si Jackie ug ang amahan sa iyang gisabak mao ang iya ra pod nga kaubang gitarista – si Lemon.

“APAN, Ignacio, ang pagbuhat sa ingon usa ka dakong sala! Sala sa balaod sa Diyos ug sala sa atong balaod! Ang magbuhat sa ingon way kapasayloan! Mag-antos sa hangtod! Gusto mo bang mao nay mahitabo unya sa atong anak, lakip kitang iyang mga ginikanan?” luhaan ang mga mata ni Elvira nga namulong.

Wala makatingog si Ignacio nga naglingo-lingo.

“Ihatod mo si Jackie, Elvira, sa Amerika sa ka-Cheche. Adto niya pakatawha ang iyang gisabak,” matod ni Ignacio. May paglurang nag diyutay ang kapungot nga iyang gibati kaganina.

Nabati ni Jackie ang gipanagsultihan nilang papa ug mama niya. Misulod siya sa lawak.

“Papa,” miluhod si Jackie sa atubangan sa iyang amahan. Nagtulo ang iyang mga luha. “Pasayloa ko, Papa, Mama, sa nahimo kong kasaypanan kaninyo. Nakaamgo ako sa akong mga sayop apan ulahi na. Di na masipong pagbalik ang salamin nga nagupok! Ug kay dinhi man ako nahisukamod, dan, anhi sab ko mobangon aron akong ipakita sa atong katilingban ang dako kong pagbasol. Biyaan ko ang ‘banda’ ug itingob ko ang akong panahon pagtabang sa inyong mga negusyo.”

Dayon mibarog si Jackie ug gigakos niya ang iyang amahan. Miduol si Elvira nga naghilak ug migakos usab kanila. (KATAPUSAN)