AKO si Myra, nagpuyo sa Bulua, Cagayan de Oro. Nagtrabaho ko sa usa ka fast food chain sa sentro sa dakbayan. 23 anyos nako apan wala pa nakahuman og skwela sa sige og part time sa trabaho. Naa pa ko sa third year sa kolehiyo.
Kining akong naila nga lalaki sa akong kinabuhi usa ka manager sa usa ka kompanya dinhi sa dakbayan.
Nag ila mi ni Neil pinaagi ra gihapon sa among mga common friends. Sa pirmero namong kita sa usa ka simbahan kay pareho man mi nagbata sa baby sa among kaila, didto nako siya unang nakita. Murag love at first sight ang nahitabo kanamong duha. Iyang gipangayo akong personal nga number ug ako sab kaniya. Nagbalos balos mi og text.
Tungod lage kay attracted ko niya deretso sab nako siya nga gisugot dihang nanguyab nako. Apan naa koy na-obserbahan nga kinaiya ni Neil. Maora siya og mata pobre. Naa koy pagbati nga ikaulaw ko niya.
Dili man gud ko niya gasunduon sa akong gitrabahoan pero gasabot ko kay nagwork sab siya, dili sab siya moanha sa among balay kay sudlonon kaayo. Hinuon kung maglaag mi, iya ko pasakyon sa iyang car pero nakita nako nga hindikan ug dili ganahan mahugawan iyang mga sakyanan.
Naa man gud one time hugaw kaayo akong sandal nga gitamak sa carpet sa iyang car ug iyang gilimpyohan deretso. Mikuha siya og tissue ug iyang gikuha ang lapok sa akong sandal. Dili usab siya ganahan kung naay mga street kids nga magtoktok sa bintana sa iyang sakyanan.
Dili nako siya ma-blame, arangan ang ilang pamilya ug wala niagi og kalisod.
Tungod sa akong namatikdan niya nga kinaiya ako lang gihilom pero wala ko na turn-off; instead, naningkamot ko nga hatagan niya og atensyon ang mga butang nga layo sa iya.
Taliwala usab niini love gyod nako siya kay halos adlaw-adlaw moingon og 'I love you.” Kon dili motawag, mag-sige og text kung iyang bakante.
Ako sab ang klase sa babae nga dili gapakita sa iya nga magpakanaa bisan gud og wala diha. Kung akong jeans kuspaw na kaayo kay mao ra gibalik-balik dili na nako gahuna-hunaon. Unsaon dili man sapian ang iyang gipanguyaban. Mao na pirme sa akong huna huna.
Wala ko nisaba nga na promote ko sa akong gitrabahoan.
Tungod kay birthday nako atong tungora, ako siya giingnan nga magkita mi sa Divisoria. Nisayo sab siya og out sa iyang trabaho kay lage nagtext man ko.
Nakurat siya sa dihang nagpark sa iyang sakyanan dihang nakita ko niya nga nagbitbit og daghan food packs.
Giuban ko dayon siya ug gipangtawag nako ang mga street kids aron ipapakaon akong mga dala.
Walay nahimo si Neil apan nitabang sa pag-apod apod sa food packs. Miabri sab ko og pagkaon ug nikaon ko uban ang mga bata samtang gisuwayan ko og hungit si Neil. Nakurat gyod siya sa akong gihimo.
Dako kaayo og katawa ang mga bata kanamo ug nagsige gyod og pasalamat. Pagsulod namo sa iyang sakyanan nakurat ko nga gihuptan niya akong kamot. Niingon siya nga na-appreciate ko niya og maayo kay wala daw nako gihuna huna nga I treat akong kaugalingon sa mga butang nga sagad gusto sa mga kababayen-an apan daw mas giuna nako ang makapakaon sa mga bata nga anaa sa kadalanan.
Niingon siya iya kong I treat sa akong birthday. Sa usa ka sikat nga restaurant ko niya gidala ug nakurat sab ko sa iyang sorpresa. Mi propose siya og kasal. Iyang gisulti sa akoa nga nakita na niya ang babae sa iyang kinabuhi nga gusto niya ikauban. Kini daw tungod sa akong kinaiya nga nakapausab daw sa iyang kinaiya.
Duha na mi ka tuig nga kasal ni Neil ug wala koy problema sa iyang pamilya taliwala sa among estado sa kinabuhi. Sa pagkakaron na batasan na namo nga mohatag og pagkaon sa mga bata sa dalan.