PORMAL nang buksan karong adlawa ang Devotee City.
Kini mao ang temporaryong pinuy-anan nahimutang sa may Fort San Pedro nga matag tuig nang tukuron sa kagamhanan sa siyudad sa Sugbo alang sa mga deboto nga gikan sa lagyong dapit.
Si Wendel Cenas, usa sa mga staff ni Konsehal Edwin Jagmoc nga maoy in-charge sa Devotee City, niingon nga opisyal nga buksan alas 8 karong buntag ang Devotee City pinaagi sa ribbon-cutting nga sundan og mubong programa.
Apan kon karong adlawa pa buksan ang Devotee City, kagahapon diha nay gibanabanang mga 30 ngadto sa 40 ka mga deboto nga ilang gipadayon.
Sagad sa sayong nisaka sa Devotee City mao ang gikan sa Siquijor, Moalboal ug Bogo City nga nabalakang maunhan sa ubang mga deboto.
“Actually wa pa gyud mi manawat pero kay diha namay niabot, ato nalang silang gidawat pero subject pa gyud sila for interview,” nagkanayon si Cenas.
Sanglit naobserbahan nga matag tuig magkadaghan ang modayon sa Devotee City, matod ni Cenas nga nidugang sila karong tuiga og 12 ka mga 10-footer van ug 14 tents gawas sa naandang 72 ka mga 20-footer van.
Kini gibanabanang maka-accommodate og 2,300 ka mga deboto nga mas daghan itandi sa 1,700 sa niaging tuig.
Ang mahimong makasaka sa Devotee City mao ang mga deboto gikan sa laing probinsiya nga way laing kasak-an dinhi sa Sugbo apan kinahanglan silang mopakita og bisan unsang proof of residency sama sa cedula o barangay certificate ingon man tiket sa barko. (CPL)