MOABOT na sa 83 ka mga sakayang pangdagat ang nakapa-rehistro na sa Coast Guardo alang sa fluvial procession ugmang adlawa.

Apan nagtuo si CG Cebu Station Commander Elpidio Gunio nga modaghan pa kini kay hangtod kagahapon sa hapon pa motapos ang ilang registration ug gipaabot nga daghan ang moapas sa deadline.

Click here for stories and updates on the Sinulog 2010 Festival.

“Alam mo naman ang ugali nang mga Pinoy na sa huli na hahabol,” nagkanayon si Gunio.

Apan aron pagsiguro sa kaluwas sa tanang mga partisipante, matod ni Gunio nga hugot gyud nilang ipatuman ang no-registration, no participation policy maong bisan kon di pa moabot og gatos ang mga partisipante, matod ni Gunio nga di gyud nila itugot ang pagsingit sa dili mga rehistradong sakayan.

Sunodsunod na nga meeting ang gipahigayon sa CG ug kagahapon laing tigom na usab ang ilang gipatawag alang sa molangkob sa sea marshall.

Matod ni Gunio nga buot ipaniguro sa CG nga sama sa nangaging katuigan, magmalampuson ug magmabulukon ang fluvial procession ni Sr. Sto. Nino.

Kapin usa ka gatos usab ang molangkob sa mga sea marshall, rescuers ug communicators.

Niadtong Martes nagpatawag usab og tigom ang CG alang sa tanang mga partisipante aron ipahibawo ang ilang gilatid nga mga guidelines labi na gyud ang ilang gidili nga mga buhat sama sa pagdala og ilimnon ug pag-inom samtang naglawig ug pagpabuto.

Matod ni Gunio nga gawas sa pag-inspeksyon sa mga dalang bag sa mga pasahero, iphon gyud nila ang gidaghanon sa mga pasahero sa matag bangka kay ilang ipaniguro nga way manghinobrang pasahero depende sa capacity sa matag bangka.

Atol sa meeting, gipahibawo na ang mga partisipante sa ilang mga assembly area sanglit ang fluvial procession gibahin man sa tulo ka mga division, gikan sa dagkong barko ngadto na sa mga gagmay;ng bangka.

Alas 6 ugma sa buntag ang assembly time ug alas 7 sugdan ang procession.

Apan alas 5:30 pa sa kaadlawon hangtod alas 9 sa buntag sirad-an ang south ug north entry sa Cebu channel aron wa nay mga barkong makasud.(CPL)