KAUBAN ra sa gidudahan nga tulisan ug tigpayuhot og drugas posibleng niunay sa pagpatay kaniya samtang siya luwan sa taxi gikan nga nakapyansa sa kaso nga gipasaka batok kaniya.

Mao kini ang pagduda ni Senior Superintendent Paul Labra, deputy chief for operations sa Cebu City Police Office 9CCPO) sa pagpatay kang Raul Dadang, 33, taga sityo Ponce Capitol site, siyudad sa Sugbo.

Click here for stories and updates on the Sinulog 2010 Festival.

Si Dadang gipusil patay sa duha ka armadong mga tawo nga luwan sa usa ka motorsiklo samtang nagsubay sa Osmeña blvd, sa milabayng adlaw gikan sa Kapitolyo

Matod pa ni Labra nga tulo ka mga anggulo ang ilang gisubay karon.

Usa niini mao nga kauban ra usab sa biktima ang mipatay kaniya tungod sa pagduda nga nihatag og impormasyon sa kapulisan.

Laing anggulo mao ang kasosyo sa biktima sa illegal nga trabaho ug wa sila magkasinabot sa ilang mga bahin o transaksyon.

Matod pa ni Labra nga gipahimudsan lang sa mga kriminal ang isyo sa “vigilante style killing” aron matabunan ang anggulo nga sila ang mga responsable niini.

Labina kay mga vigilante ang gidudahang ningpatay sa usa ka suspetsadong mangunguot nga taga Basilan nga bag-o ra sab gibuhian sa kapulisan.

Sa sayo pa, si Dadang nasikop sa kapolisan atol sa checkpoint nga gipahigayon niadtong Enero 10 alas 11 sa buntag.

Siya luwan sa PUJ ug sa dihang gipakanaug ug gi-rekisa, nakuha gikan sa iyang posisyon ang mga shabu paraphernalia ug usa ka icepick.

Ang kapulisan nipasaka kaniya og kaso nga concealing of deadly weapon ug kalapasan sa section 12 sa Dangerous Drugs law.

Apan, nakapyansa siya sa kaso nga gipasaka batok kaniya.

Human kini makapyansa nisakay siya og taxi uban sa iyang kaipon nga mabdos.

Ilang kuyog ang usa ka bayot ug laing lalake subay sa Osmeña Boulevard.

Apan sa wa pa siya makaabot eskina dan Sanciangko, gituparan siya og usa ka motorsiklo ug dayon gipusil makadaghan si Dadang.

Atol sa hitabo, ang driver nga si Joar Miranda, 24, taga Banilad napagan usab sa pagpamusil ug naigo sa tuo nga bahin sa iyang paa ug seko.

Ang mga suspek nisibat paingon sa dalan Sanciangko, samtang si Dadang gidala sa mga sakop sa Barangay intelligence Network paingon sa Cebu City Medical Center (CCMC), apan gideklarar siya nga dead on arrival.