GIKAN nasamaran sa ikaduha ka sunod-sunod nga panag-atbang sa conference, miaabot sa punto para sa San Miguel Beermen (SMB) nga husto na.
Nabaslan sa Beermen ang Meralco Bolts paagi sa 102-86 nga kadaogan niadtong Lunes sa gabie sa SMART-Araneta Coliseum aron atbangon ang Rain or Shine Elasto Painters sa semifinals sa 2015 PBA Governor's Cup.
Namuhunan ang Beermen sa una nga kwarter diin nibinat sila og 12 puntos nga labaw gikan sa 15-12 sa 5:27 minutos tungod sa pangatake nila ni Ronald Tubid, Gabby Espinas, Arwind Santos, Arizona Reid ug Alex Cabagnot, kinsa nibira og upat ka assist, dos puntos og usa ka steal sa kwarter.
Sakto-sakto lang ang pamuhunan sa SMB tungod kay nitusik og ayo ang Bolts sa ikaduha nga kwarter labina nga napanas nila ang biya paingon sa duha ka puntos nalang paghuman sa ikatulo nga kwarter, 67-65.
Gikan dinha, natumban sa Beermen ang pedal aron mobinat og dakong labaw sa pagpangulo ni Marcio Lassiter, nga namuntos og 15 sa kataposan nga kwarter sa iyang 17 puntos sa dula apil na ang duha ka sunod-sunod nga tres sa tulo niyang nahimo, diin ang Bolts wala na makaapas.