USA ka Dabawenya ang mihulip sa laing Dabawenya sa sikat nga acoustic group nga M.Y.M.P (Make Your Mama Proud).
Si Juliet Bahala, ang Star of Davao 4th grand winner mao ang napili nga mohulip kang Juris Fernandez.
Ang M.Y.M.P, mao ang bandang nagpasikat sa acoustic revival sa pipila ka mga old hits sama sa Waiting in Vain, Tell Me Where It Hurts, Especially For You, ug sa mga signature hits sama sa A Little Bit ug Talaga Naman.
Chika nga si Juliet, nag-audition alang sa M.Y.M.P. sa nakalabay nga tuig human nga nameligro ang pagbungkag sa banda tungod may gamay nga suliran tali nila ni Juris ug sa founder nga si Chin Alcantara.
Ug sa nakalabay nga adlaw, ang handler ni Juliet nganhi sa siyudad sa Davao nga si Jeremy Sarmiento, mikumpirma ngadto sa mga entertainment writers sa dakbayan nga ang Star of Davao Winner na gayud ang bokalista sa nahisgutang banda.
"She is now rehearsing with the band in Manila," sumala ni Jeremy.
Wala pa na-introduce sa Manila si Juliet. "In fact, the teaser poster for M.Y.M.P. ay nakatalikod sila," sumala ni Jeremy nga usa sab ka composer.
Wala pa nasayran kung kanus-a gayud ang debut performance ni Juliet sa M.Y.M.P. apan usa ka gig sa Pebrero 12 nga gi-organize sa ABS-CBN Sunday variety show nga ASAP ang gitakdang magpasundayag sa grupo.
Ni Jeremy, usa ka major launching concert alang kang Juliet isip M.Y.M.P. vocalist ang himuon nganhi sa siyudad karong Pebrero 13 sa Matina Town Square (MTS).
Ang maong event, usa ka back-to-back concert uban sa Davao-based Cebuano balladeer nga si Chad Borja nga kauban ni Jeremy, na-produce sa maong pasundayag.
Sumala ni Jeremy nga sakto lamang ang maong tribute alang sa usa ka Dabawenya nga milambo ang career.
Gisulti ni Jeremy nga magpadayon ang banda sa pop-rock flavor sa mga kanta ug siyempre, di gayud nila talikdan ang acoustic flavor.
Di pa hinuon masulti ni Jeremy kung magpadayon ang banda sa pag-revive sa mga sikat nga mga kanta kaniadto. Hinuon, gisulti ni Jeremy nga andam siyang mohanyag sa iyang mga komposisyon kung buot sa grupo nga gamiton kini.
Giklaro ni Jeremy nga natungnan lamang nga taga-Davao ang kanhi ug ang bag-ong bokalista sa M.Y.M.P.
Wala daw kini nagpasabot nga tungod kay gikan sa Davao si Juris, kinahanglan gayud nga taga-Davao sab ang mopuli kaniya. Apan nahitabo.
Gani, tungod kay gikan siya sa Davao, nahimo pa kining babag alang kang Juliet tungod sa suliran sa communication ug logistic.
Matud ni Sarmiento nga ang Manila-based Davaoeno balladeer/DJ Thor (natawo nga si Ettori Dulay) ang mirekomenda kang Juliet ngadto sa grupo. Si Thor, classmate ni Jeremy sa high-school didto sa Maryknoll sa Panabo ug school maye sab sila sa Ateneo de Davao University.
Si Thor, may suod nga panag-ingnan ngadto sa M.Y.M.P. ug nakig-uban na kanila sa daghang mga proyekto, lakip na sa revival sa kantang Be My Number Two, gikan sa iyang album nga Soul Obsessions Duets With Thor niadtong 2007.
Niadtong tuiga sab, nahimamat ni Thor si Juliet dihang mi-guest siya sa Star of Davao.
"Thor was the guest performer during that event. Juliet won the competition," saysay ni Jeremy.
Nagkasuod sila si Thor ug Juliet dihang nag-bonding sila sa balay ni Jeremy. "It was then that they knew each other... and Thor was amazed with Juliet's voice," ni Jeremy.
Ug tungod kay mibiya sa M.Y.M.P. si Juris una natapos ang tuig 2009, girekomenda ni Thor ang iyang higala.
Apan di sab sayon alang kang Juliet nga makasulod sa nahisgutang banda. "We sent demos, profiles," pahayag ni Jeremy.
Aminado si Jeremy nga ubay-ubay sab ang kalisod nga ilang nasinati tungod sa kalayo sa Davao ngadto sa kauluhan.
Dako sab matud pa ang ilang gasto tungod sa pamasahe ug uban pang gastuhanan sa pag-adto sa Manila alang sa audition.
Nasayran sab nga ubay-ubay ka mga aspirants, lakip na kadtong may tatak na sa industriya ang miapil sab sa audition. Apan si Juliet ang nakaangkon sa gikahinamang pag-uyon sa band members.
"They (the band) want something fresh... and Juliet qualifies," ni Sarmiento.
Sa pikas bahin, malipayon sab si Thor sa naabot karon ni Juliet uban sa paningkamot ni Jeremy.
"Basta Davao talent, ganahan gyud ko motabang. Happy pod ni mi Jeremy for Juliet," niya.
Gidayeg sab ni Thor si Juliet.
"Ayos kaayo kay naa na sad Davao talent nga naa diri (Manila). Kuyaw kaayo si Juliet uy, talented kaayo bataa, grabe gyud!"
Si Juliet, usa ka third-year Masscom student sa University of Mindanao.
Nahisakop siya sa UM Choir nga mananaug sa National Music Competition for Young Artists (NAMCYA) sa Manila.
Atol sa iyang high school ug elementary, si Juliet mao ang regional NAMCYA grand champ sa Davao ug nahimong runner-up sa Manila.
Sama kang Jeremy, si Juliet, nahimong presidente sa Singing Teen nga usa ka grupo sa mga batan-ong singers sa Davao City National High School atol sa iyang pag-high school.
Ning bag-ohay lamang, nahimo sab siyang sakop sa Fivibe, usa ka group sa wedding singers sa Davao.
Nahimo na sab siyang front act artist sa daghang mga concerts sa major Manila-based stars nganhi sa dakbayan.
Kanunay sab nga kuhaon si Juliet sa daghang mga aktibidad nga gipaluyohan sa kagamhanan sa siyudad.
Sa milabay nga tuig, nagsilbi sab siyang actress/singer sa Ay Quile, the musical nga gipasundayag nganhi sa siyudad.
Siya sab ang paboritong kuhaon nga Jingle singer sa dakbayan.
Migawas sab sa milabay nga tuig ang iyang Bisaya version sa Nobody Nobody But You nga gipatugtog sa mga nangunang major radio stations sa siyudad Davao.
Naninguha si Juliet nga pinaagi sa iyang nindot nga tingog, matabangan niya ang iyang pamilya.
Mapasigarbuhon kang Juliet ang iyang mga ginikanan nga sila Rodrisito ug Esabilita.
Ang iyang amahan, usa ka kanhing construction worker apan karon, differently-abled na. Apan karon, siguradong tanan ang mapa-'wow' sa simpleng dalaga nga karon, big time na!