USA ka lalaking gipasanginlan nga miamong-among sa 18-anyos nga dalaga ang nasikop sa kapulisan didto sa dakbayan sa Tagum, Huwebes sa gabii.
Ang dinakpan nailhan nga si Alberto Laurente, 37, ug molupyo sa Barangay Madaum, siyudad sa Tagum.
Sa report gikan sa Tagum City Police Station, nasayran nga pasado alas 8:00 sa gabii, nasikop sa mga mirespondeng sakop sa Tagum CPS ang suspek didto gihapon sa susamang lugar.
Gireklamo ang suspek sa biktima nga gitago sa ngalang Ana, ug molupyo sa Barangay Apokon.
Sumala pa nga gihimas sa suspek ang pribadong parte sa iyang kalawasan didto sa Barangay Madaum.
Nahitabo matud pa ang pag-molestiya sa suspek ngadto sa biktima niadtong Martes sa may Barangay Madaum.
Ang biktima daling nagpatabang sa mga otoridad mao nga nasikop ang suspek.
Ang suspetsado nagtingkagol na karon sulod sa selda samtang gi-imbestigahan pa sa kapulisan.
Kasong act of lasciviousness ang giandam na karon sa kapulisan batok sa suspetsado. (Marvin Pineda)