GITAAS na sab ang alerto sa militar tungod sa subling paglihok sa mga armadong grupo sa probinsiya sa Maguindanao.

Sigun sa taho gikan sa Tactical Command Post sa 6th Infantry (Kampilan) Division sa Philippine Army nga nasiplatan sa mga sibilyan ang pagbahis-bahis sa mga sakop ni Kumander Ameril Umbra Kato sa 105th Base Command sa lawless Moro Islamic Liberation Front (MILF) group.

Gitahasan ni 6th ID Chief Major General Anthony Alcantara sila si 603rd Brigade Commander Colonel Ernesto Aradanas ug 104th Brigade Commanding Officer Colonel Mario Mendoza nga bantayan ang lihok sa mga rebelde nga nagplano nga moatake una moabot ang piniliay.

Tumong nila nga ipamugos sa gobyerno nga ipatuman ang Memorandum of Agreement on Ancestral Domain kun MOA-AD.

Giklaro ni Maguindanao Acting Governor Bai Nariman Ambolodto nga anam-anam na nga mibalik ang normal nga sitwasyon sa probinsiya gumikan sa pagtinabangay sa mga lokal opisyal ug suporta sa katawhan.

Gidugang ni Alcantara nga dili mokompiyansa ang mga otoridad sa hilom nga sitwasyon karon sa Maguindanao gumikan kay nagpahipi lamang sa palibot ang mga rebelde ug naghulat lang sa tukmang oras aron maghimo og samok.

Iyang gikompirma nga dunay mga lugar nga gilubluban sa mga Private Armed Groups (Pags) sa pamilyang Ampatuan nga gitudlo nga nalambigit sa mangilngig nga masaker ug unsa mang orasa ila kining sudlon. (Edgardo Fuerzas)