GIPAKITA sa ALA boys nga sila si Milan “Melinyo” Melindo ug AJ “Bazooka” Banal nga andam na gyud sila alang sa mas dakong away pinaagi sa pagbuntog sa ilang tagsatagsa ka dekalidad nga kontra sa miaging gabii sa “Bakabakan sa Sinulog” boxing promotion sa Waterfront Hotel sa Lahug, Cebu City.

Si Melindo (20-0, 5KOs) mitumba kang American Anthony “Baby Assasin” Villareal (9-3, 4KOs) sa 1st round nga nagsilbi niyang agianan paingon sa unanimous decision nga kadaugan sa ilang WBC Intercontinental Youth flyweight title bout.

Click here for stories and updates on the Sinulog 2010 Festival.

Samtang si Banal (21-1, 17KOs) mipaundang sa beterano niyang kontra nga si Mexican Cecilio “Boga” Santos (24-12-3, 14KOs) sa 4th round sa ilang non-title fight.

Agresibo na dayon si Melindo sa 1st round ug iyang gitumba si Villareal pinaagi sa right hook. Nakabarog si Villareal ug nakaprotekta sa iyang kaugalingon pinaagi sa pag-job ug pagadagandagan.

Sa 3rd round, nakuha na ni Villareal ang iyang tayming apan sa 4th round, nibarag siya human naigo sa laing right hook ni Melindo.

Sukol-dagan na ang estilo ni Villareal gikan niadto apan masanta gyud ni Melindo ang iyang pagdagandagan.

Adunay higayon sa naghinapos nga bahin nga napasakitan sab ni Villareal si Melindo apan wala na siya nakaapas sa pinuntosay.

Ang tulo ka judges pulos nipabor kang Melindo, 97-93, 95-94, 96-93.

Sa laing away, wala pa kaayo nakaarte si Banal sa 1st round apan sa 2nd ug 3rd rounds, hayan nakapasulod na siya’g mga makusog nga kumo.

Sa 4th round, naigo ang agtang ni Santos sa makusog nga walang kumo ni Banal nga maoy nakaparag sa Mexican.

Wala na usiki ni Banal ang maong kahigayunan ug gipauwanan niya’g mga kumbinasyon si Santos hangtod nga natumba kini sa nahabiling 35 segundos sa round.

Ang laing ALA boys nga sila si James Bacon ug Larry “Bon Jovi” Canillas nipaudang sab sa ilang tagsatagsa ka Thai nga kontra.

Gipaundang ni Bacon si Thittichon Singwancha sa 4th round samtang nagkinahanglan lang og duha ka rounds si Canillas aron pakamangon si Petch Twins Gym.

Sa lain pang mga away, midaog sila si Jayson Inso batok kang Jonel Gadapan (UD) ug Jojo “The Flash” Intor batok kang Romnick Hoybia (MD).

Duha amateur fights ang nidayandayan sa promosyon tali sa mga sakop sa RP national training pool.

Si Irish Magno midaog batok kang Katrina Jane Recaido hasta si Adonis Cabalquinto batok kang Jimmy Vallares.