Jose Lebumfacil Tomarong
Maharlika, Sambag II, Cebu City
Santo Niño ikaw ang nanaog nga kahayag,
Ikaw ang kahulogan sa banagbanag.
Sa Imong pagkatawo ning kalibutan
Hulagway ka sa banagbanag sa kabuntagon.
Inigka banagbanag mosugod pagtalikod
Ang gahom sa kadulom ug magsugod
Pagbanwag ang gahom sa kahayag.
Pit Senyor! Viva Senyor Santo Niño!
Ikaw ang banagbanag modalit og paglaom
Sa nagtanga nga mga kalag nga unta sila
Mosagop na sa Imong limbationg kasanag.
Santo Niño, Ikaw ang kahayag nga moabag
Namo pagkaplag sa nawalang paraiso
Ning kalibutang giharian na pag-ayo
Sa masakitong kagabhion sa mga garbo.
Pit Senyor! Viva Senyor Santo Niño!
Ikaw ang Hari ug Ginuo sa pagpaubos,
Manluluwas sa sinakit nga mga kabos.
Ikaw ang Adlaw sa paglaom,
Paharia na ang Imong gahom aron
Mobantang ug tin-aw kaayong mohingilin
Sa mangingilad nga kadulom nga gihalad
Sa kalibutan sa mga way salabutan.
O Balaang Bata maluoy ka kanamo!
Papahulaya na kami sa kasakitan nga dalit
Kanunay ning masalad-ong kalibutan.
Pasakya na kami sa langitnon mong bapor,
Idunggo kami sa Imong baybayon sa kalipay
Ug kinabuhing dayon!
