GIHAGIT ang mga deboto ni Senior Santo Niño nga sundon ang kinabuhi ni Birhen Maria nga nagdala sa pagtuo sa batang Hesus ngadto sa uban nga maoy kahulogan sa ‘Traslacion’.
Si Rev. Fr. Marvin Mejia atol sa iyang homily sa Misa de Traslacion sa National Shrine of St. Joseph sa dakbayan sa Mandaue nipahinumdum sa mga deboto nga motamod sa mithi ni Birhen Maria.
“Kinahanglan nga kita sama ni Birhen Maria sa pagdala sa pagtuo sa Senior Sto. Niño ngadto sa uban,” tipik sa homily ni Mejia.
Gisanglitanan ni Mejia base sa Gospel nga ang pag-transfer (Traslacion) susama sa gihimo ni Maria nga niduaw sa iyang ig-agaw nga si Isabel.
Atol sa maong pagduaw di lang si Maria apan uban kaniya si Hesus nga iyang gisabak niadtong higayona.
Si Hesus maoy tinubdan sa maayong balita.
Dakong garbo alang sa mga Sugboanon nga ang debosyon sa Balaang Bata nahimong inila sa tibuok nasod.
Gihulagway ni Mandaue City Mayor Jonas Cortes nga malinawon ug hapsay ang gipahigayon nga Traslacion kagahapon sa buntag, diin nalangay ang pag-abot sa
imahen gumikan sa bagang duot sa mga tawo nga nag-atang sa kadalanan.
Nag-atang nang daan ang mga public official sa ganghaan sa National Shrine of St. Joseh naglakip nila ni Cebu Governor Gwen Garcia, Vice-gubernatorial candidate Glenn Soco, Kongresista Nerissa Soon-Ruiz, Cortes ug ang iyang kapikas nga si Sarah, Board Member Wenceslao Gakit, congressional candidate Luigi Qui-sumbing.
Namatikdan nga gi-hikling sa nagkaatbang nga mga opisyal ang pulitika human nagka-uban atol sa misa de Traslacion.
Karong alas 4:00 sa kaadlawon ipahigayon ang Dawn Procession sa Sto. Nino gikan sa National Shrine of St. Joseph paingon sa Ouano wharf alang sa fluvial procession gikan sa kadagatan sa Mandaue city ngadto sa dakbayan sa Sugbo.