PUNO sa pagmahay ang 28-anyos nga inahan sa dihang iya nalang nga naabtan nga naugdaw na ang ilang balay ug nangapaig ang iyang tulo ka mga gagmay nga mga anak sa sunog sa miaging gabii.

Ang iyang inahan ug laing gamay pa sab nga anak nangaluwas, apan nakaangkon og paso.

Click here for stories and updates on the Sinulog 2010 Festival.

Gikompirmar sa mga silingan ni Eileen Ponzal, 28, buwag sa bana ug inahan sa napaig nga mga bata nga wa siya sa ilang balay atol sa hitabo kay didto sa Internet café.

Giila ni F03 Cipriano Codilla sa Mandaue City Fire Department ang mga nakalas nga sila si Mark, 6; Joey, 4 ug Gideon Ponzal, 2, samtang naangol ang ilang apohan nga si Wilmena, 52 ug James, 3, laing igsuon sa mga bata.

Kini nahitabo duol sa St. Martin Village, barangay Banilad, dakbayan sa Mandaue.

Nadawat sa kabomberohan ang alarma sa mga alas 9:45 sa miaging gabii.

Nagduda ang kabomberohan nga ang nagsiga nga lamparilya maoy hinungdan sa sunog sanglit katuigan nang giputlan sa linya sa kuryente ang banay nga Ponzal.

Base sa initial nga imbestigasyon, nangatulog na ang mga biktima ug nakamata na lang si Wilmena sa tumang kainit.

Iya na lang namat-an nga nagdilaab na ang ilang balay.

Bugtong si James nga diha sa iyang tupad naghigda ang dali niya nga nakugos ngadto sa gawas sa balay nga nagkayo, nabiyaan ang laing tulo ka mga bata nga nangatug sa pikas kuwarto.

Buot pa unta niyang balikan ang laing tulo niya ka mga apo apan dako na kaayo ang kayo.

Gihulagway ni Codilla nga naggakos pa ang napaig nga lawas nila ni Mark ug Joey diha sa higdaanan samtang nabuwag ang lawas ni Gideon ingon sa nagpaingon sa pultahan.

Ang sunog giingong nagsugod sa lawak ni Aileen.

Ang kabomberohan nakadunggog og tabi-tabi nga nakatilaw pa og grabeng kasaba si Eileen sa iyang inahan human gibasol sa kamatayon sa mga bata nga makatabang pa unta sa pagluwas kaniya.

Giisa ngadto sa 2nd alarm ang sunog ug gibana-bana nga moabot sa P70,000 ang danyos.

Samtang si Mandaue City Mayor Jonas Cortes nagkanayon nga gisusi pa sa City Social Welfare and Services ang hitabo alang sa itunol nga hinabang pinansiyal ngadto sa pamilyang Ponzal.

Si manlalaban Gonzalo Malig-on, chief of staff ni Kong. Nerissa Soon-Ruiz niingon nga mohatag silag financial assistance nga ipaagi sa Dept. of Social Welfare and Development (DSWD).

Ila sab nga hatagan og medical assistance ang apohan ug apo nga naa sa Vicente Sotto Memorial Medical Center (VSMMC).

Nasayran nga ang patay nga lawas sa mga bata anaa sa Cosmopolitan Funeral Homes samtang ang apohan ug si James anaa sa VSMMC aron magpaalim sa ilang mga paso.

Si Welmina nakaangkon og second degree burns sa iyang bukton samtang si James dunay first degree burns sa bukton gihapon. (dugang taho ni Jona F. Reyes-USJ-R Media Intern)