GIKATAHONG nangahadlok ang ubang mga mangunguot nga taga laing dapit nga ania karon sa dakbayan sa Sugbo human tumbaha sa giingong mga vigilantes ang duha ka mga gikatahapang kriminal nga bag-o lang nakagawas sa bilanggoan.

Sa akong tan-aw, dunay nakasunod sa giingon nga, “Kill the chickens to scare the monkeys.”

Click here for stories and updates on the Sinulog 2010 Festival.

Kon molampos kini, manguli na lang sila kay tingalig maoy isunod.

Apan di gihapon nato kalimtan nga kadtong gipangtumba di kadto mga manok.

***

Matod pa ni Cebu City Police Chief Pat Comendador, ang pagkapatay sa duha ka mga suspetsado nagpakita nga ang Sugbo di luwas ug kuyaw alang sa mga kriminal.

“Let this be a warning that they (criminals) should not disrespect the Sinulog festivity by their activities,” matod pa ni Comendador.

Matod pa sa akong higala nga si Sr. Insp. Michael Bastes, hepe sa Theft and Robbery Section, tinuod gyud diay nga gustong manguli kadtong mga gidudahang mga mangunguot nga ilang nasikop.

Mamenusan sab ang ilang problema.

***

Nagbaha ang mga turista dinhi sa dakbayan sa Sugbo nga naggikan sa nagkalain-laing bahin sa Pilipinas ingon man sa mga langyaw gikan sa ubang mga nasod ug mga balikbayan gikan sa Estados Unidos.

Usa sa mga timailhan mao ang kadaghan sa mga tawo nga nisaksi sa Halad 2010 nga gipasundayag sa Ang Tipiganan sa mga Kanta ug Kinaiyang Sugbuanon Foundation Inc. ni Dr. Jose “Dodong” Gullas didto sa Waterfront Hotel.

Ang gipasalig ni Col. Comendador mao nga luwas gihapon ang Sugbo sa mga turista ug sa mga maayong lungsuranon.

***

Daghang naiknat ang kilay sa dihang mosalmot sa float category sa Sinulog grand parade ang Cebu City Hall ug maoy ipasundayag ug ipasigarbo South Road Properties.

Sakay sa maong float mao ang mga kawani sa City Hall nga magsul-ob og mga T-shirts nga dunay marka nga “S.R.P. Suya Ra ang Probinsya.”

Nakalimot ang mga kadagkoan sa City Hall nga sayo pa kaayong ipanghambog ang pagkahalin sa pipila ka luna sa SRP kay nagbaguod pang syudad pagbayad sa utang niini.

Gawas pa, kanus-a man intawon mahitabo nga gigamit ang Sinulog sa pagpangsungog?

Wa gyud sila mahadlok og gaba?

--Sun.Star Superbalita [Cebu]